Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Fərid Baxışovun (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Firuzə Kərimovanın sədrliyi ilə keçirilən prosesdə hökm oxunub.

Məhkəmənin hökmü ilə o, cinayət işi üzrə məsuliyyətindən azad edilib və iş üzrə icraata xitam verilib.

İttiham aktına görə, hadisə 02 avqust 2025-ci ildə, saat 15:00 radələrində Abşeron rayonu ərazisində qeydə alınıb.

Belə ki, 1978-ci il təvəllüdlü, 9 uşaq atası olan Fərid Baxışov ailə üzvləri ilə birlikdə yaşadığı evdə məişət zəminində qızı, zərərçəkmiş Günayə Baxışova (adı, soyadı şərtidir) ilə mübahisə edib. Buna səbəb atanın həmin gün paltaryuyan maşını söndürməsi olub. Bu zaman ata ilə qızı arasında narazılıq yaranıb. Mübahisə zamanı Fərid qəsdən Günayənin üzərinə hücum edib, əli ilə boğazından tutaraq sıxıb, ardınca əl, yumruq və baş (kəllə) zərbələri endirib. Bu zərbələr nəticəsində zərərçəkmiş şəxs yerə yıxılıb, lakin ata qızına qarşı zorakılığını davam etdirərək baş, qol, kürək və bədəninin müxtəlif nahiyələrinə dəfələrlə yumruq zərbələri vurub.

Hadisə nəticəsində Günayənin alnının orta hissəsində 1 ədəd, sağ qaşın bayır bucağında 1 ədəd hematoma (dərialtına qansızma), sağ üst göz qapağında qançır, sol bazu nahiyəsində 1 ədəd, belin sağ yarısında 1 ədəd, kürəyin sol hissəsində isə 1 ədəd geniş sahəli qançır aşkarlanıb. Qeyd olunan xəsarətlər dərəcəsinə görə sağlamlığın qısa müddətə pozulmasına səbəb olub.

Hadisədən sonra Günayə DİN-nin “102” xidmətinə zəng edib atası tərəfindən döyülməsi barədə məlumat verib. Daha sonra Fərid Baxışov saxlanılaraq cinayət məsuliyyətinə cəlb edilib.

Məhkəmə iclasında dindirilən Günayə atası ilə barışdığını, ona dəymiş ziyanın tam olaraq ödənildiyini və hazırda onun barəsində heç bir şikayəti olmadığından söyləyib.