Ermənistan Baş naziri Nikol Paşinyan növbəti dəfə xalqa çağırış edib. Baş nazir qeyd edib ki, bu gün onu "satqın" adlandırsalar da, məhz indiki hökumətin əməlləri nəticəsində 50 ildən, 100 ildən, 150 ildən sonra Ermənistan dövlət olacaq. Onun sözlərinə görə, bir ölkəni təhlükələrdən ancaq legitimlik sığortalaya bilər. Paşinyan bu kontekstdə qonşularla normal münasibətlərin önəminə diqqət çəkib:
"Bizim vəzifəmiz dövlətimizin təhlükəsizliyini təkcə bu gün deyil, 100 il sonra da təmin edəcək qərarlar qəbul etməkdir. Mən bunu iki il əvvəl soruşurdum, indi soruşmuram, deyirəm ki, belə olacaq. Bu, ilk növbədə legitimlik strategiyasına görə olacaq". Paşinyan əlavə edib ki, Ermənistan müstəqilliyi dövründə heç vaxt indiki qədər təhlükəsizliyə malik olmayıb. Paşinyan açıq şəkildə etiraf edir ki, çətin və emosiyalara zidd qərarlar qəbul olunmaqdadır. Ona görə də baş nazir cəmiyyəti əvvəlcədən alışdırmağa, psixoloji müqaviməti azaltmağa çalışır. Göstərməyə çalışır ki, bugünkü addımlar müvəqqəti maraqlardan deyil, uzunmüddətli strategiyadan qaynaqlanır. Xalqa mesaj verir ki, "əgər birlikdə qərar versələr, dövlətçilik sarsılmaz olacaq". Bu, həm siyasi sabitlik, həm də hakimiyyətin möhkəmlənməsi baxımından daxili auditoriyaya yönəlmiş mesajdır. Baş nazirin vurğuladığı kimi Ermənistanın gələcəyi üçün sülh və əməkdaşlıqdan başqa alternativ yoxdur. Əsas hədəf Azərbaycan və Türkiyə ilə münasibətlərin normallaşdırılmasıdır.
Politoloq Natiq Miri Sherg.az-a açıqlamasında deyib ki, Paşinyanı narahat edən əsas məqam erməni ictimai şüurudur. Ekspert vurğulayıb ki, baş nazir o səbəbdən mütəmadi olaraq erməni ictimai rəyinə bu cür fikirlər təlqin edir:
"Əlbəttə, bu siyasət və təbliğat intensivləşməlidir. Şüur mütəmadi olaraq reallıqları qəbul etməlidir ki, insanlar gerçəklərin fərqinə vara bilsin. Erməni ictimai rəyi uğrunda çox ciddi mübarizə gedir. Rusiyanın dəstəklədiyi revanşist müxalif qüvvələr Kremldən aldıqları təlimat və maliyyə ilə ictimai rəyi dəyişməyə çalışırlar. Hökuməti "satqın" adlandıraraq Paşinyan əleyhinə fikir formalaşdırmaq və Ermənistanın sanki dövlət olaraq "çökdüyünü" insanlara sırımağa cəhd edirlər. Digər yanda isə mövcud həqiqətləri söyləyən, dövlət və xalq üçün strateji qərarlar qəbul edən bir hökumət və onun başçısı Nikol Paşinyan amili dayanır. Paşinyan intensiv olaraq ictimai şüura həqiqətləri söyləməklə Ermənistanı hansı potensial təhlükələrdən sığortaladığını göstərməyə çalışır. Baş nazirin bu siyasəti doğrudur. Çünki erməni ictimai şüuru həqiqətin fərqinə varmasa, Ermənistan cəmiyyətini aldatmaq çox rahat olacaq. Gürcüstan modeli ortadadır. Mixail Saakaşvilinin qısa müddətdə bütün korrupsiyanı ləğv etdiyi bir ölkədə Rusiya saxta "gürcü milyarderi" fiqurunu ortaya çıxarmaqla hakimiyyəti asanlıqla devirdi. Eyni modeli Ermənistanda tətbiq etmək niyyəti güdürlər. Milyarder Samvel Karapetyan bilavasitə Bidzina İvanaşvilinin başqa bir formasıdır. Fərq ondadır ki, N.Paşinyan zamanında S.Karapetyanı zərərsizləşdirməyi bacardı. Ancaq onun arxasında duran Rusiya bütün imkanlarını, o cümlədən Rusiyadakı erməni milyarderlərin maliyyəsini 2026-cı ildəki parlament seçkisinə yönəldəcəyi ilə bağlı potensial təhlükələr mövcuddur. Rusiya Ermənistanda iqtidarı devirmək fikrindədir. Paşinyan bunu bildiyi üçün narahatdır".
N.Miri əlavə edib ki, əvvəlcə siyasi hakimiyyət özü legitim olmalıdır:
"Paşinyana qədər Ermənistanda legitimlik problemi olub, heç vaxt demokratik seçki keçirilmədiyi üçün bütün seçkilər saxtalaşdırılıb. Erməni xalqı bunun fərqində olduğu üçün Sarkisyan-Koçaryan cütülüyünü dəstəkləmədi. Legitimlik həm də bir ölkənin ərazi bütövlüyünün, suverenliyinin, sərhədlərinin tanınması və konstitusiyada təsbit olunmasıdır. Ermənistan Konstitusiyasında qonşulara ərazi iddiaları yer almaqdadır. Bu faktın özü dövlətin legitimliyini şübhə altına alır və müharibə riskləri yaradır. Paşinyan heç kimdən asılı olmayan, müstəqil qərarlar verən bir dövlət qurmağı arzulayır. Son aylarda məhz bu yöndə addımlar atdığını deyir. Həqiqətən, Ermənistan tərəfi Vaşinqtonda imzaladığı sənədlərə qədər heç vaxt bu qədər suveren olmayıb. Daim Rusiyanın əyaləti kimi çıxış edib. Paşinyan indiki dövrlə keçmişin rəzil durumunu müqayisə edərək, xalqa düzgün seçim etməyin yollarını göstərir. Baş nazir erməni toplumuna real təhlükəsizlik sistemi, legitim və müstəqil dövlət, suveren Ermənistan qurmağın sözünü verir, bu yolda dəstək istəyir. Əhatə olunduğu qonşularla normal münasibətlər qurmağın önəmini izah edir. Bununla da, potensial müharibə risklərini aradan qaldırır".
