“Məlik Dadaşov kimi görkəmli sənətkarın 100 illiyini keçirtmək mütləq lazımdır. Hətta deyərdim ki, vacibdir. Məlik Dadaşov bir insan, bir aktyor, bir həmkar kimi çox nəhəng idi. Vaxtilə onunla birlikdə universitetdə də dərs demişik. Onu necə unudub, yaddan çıxarmaq olar? Sənətkar unudulanda ölür”.

Bunu Moderator.az-a açıqlamasında xalq artisti Elmira Şabanova deyib. O daha sonra əlavə edib:

“Mən Məliki hər zaman müdafiə etmişəm. Bunu onun ailə üzvləri də, sənətkarlar da çox gözəl bilir. Məlik Rus Dram Teatrında direktor olanda məni də ora dəvət etdi. 2 il mən həmin teatrda çalışdım. Teatr direktoru kimi Məliki çox sevirdi, çünki o özünü rəhbər kimi yox, sadə aktyor kimi aparırdı. Polad Bülbüloğlu Məliklə yola getmirdi, onu sevmirdi. Bir gün Polad Bülbüloğlu Rus Dram Teatrına gəldi. Bütün aktyorları yığdılar, təbii ki, mən də orada idim. Məqsəd də bu idi ki, guya Məlikdən şikayətlər var, o yaxşı işləmir, kollektiv arasında ayır-seçkilik salır. Halbuki belə deyildi. Onun nədənsə Məlik Dadaşova münasibəti yaxşı deyildi. Başladı hamının içində Məliklə çox olmayan rəftar etməyə. Bütün aktyorlar da ruslar, cuhutlar idi. Bizimkilərdən də var idi. Heç kim qorxusundan səsini çıxartmadı. Ayağa qalxdım və dedim ki, Polad müəllim, Məlik Dadaşov Azərbaycanın xalq artistidir və çox gözəl də aktyordur, əgər ona sözünüz varsa təklikdə onunla danışın, bu qədər insanın qabağında ona niyə söz deyirsiz? Hər kəs susdu, bircə mən çıxış etdim. Polad bir kəlmə belə demədi. Bu çıxışımdan sonra Polad Bülbüloğlu mənimlə düşmən oldu. İmkan vermədi ki, mən “xalq artisti” fəxri adı alım. Ona görə də gec aldım. Ondan sonra Mədəniyyət Naziri Əbülfəs Qarayev oldu. O vəzifəyə qələn kimi məni yanına çağırıb dedi ki, siz çoxdan xalq artisti olmalı idiniz. Mən bu haqda heç kimə deməmişdim. Gəlib o vaxt evdə həyat yoldaşım Rüfətə deyəndə mənə demişdi ki, nahaq qarışmısan. Elə bu qarışmamalar insanların həyatını məhv edir də. Mən açıq danışan şəxsəm. Bu həyatda təmiz, namuslu, dürüst insanlar qəbul olunmur” deyə sənətkar bildirib.