28 May – Azərbaycanın müstəqillik tarixində mühüm gündür. Bu il Müstəqillik Günü ikiqat əhəmiyyət daşıdı. Bir tərəfdən Azərbaycan Xalq Cümhuriyyətinin yaranmasının 107-ci ildönümü qeyd olundu, digər tərəfdən isə Laçında – işğaldan azad edilmiş torpaqda, dağların qoynunda inşa olunan Beynəlxalq Hava Limanının açılışı baş tutdu. Bu önəmli tədbir Azərbaycan, Türkiyə və Pakistan liderlərini Laçında bir araya gətirdi. Burada üç qardaş ölkə arasında ikinci Zirvə Görüşü keçirildi. Həm siyasi, həm də hərbi əməkdaşlıq baxımından strateji əhəmiyyətə malik olan bu görüş regionda yeni mərhələnin başlanğıcı kimi dəyərləndirilir.
Mövzu ilə bağlı Sherg.az olaraq Türkiyənin Azərbaycandakı keçmiş səfiri, “İMZA” Sosial İnkişafa Dəstək İctimai Birliyinin Türkiyədəki nümayəndəsi Hulusi Kılıçla həmsöhbət olduq.
Müsahibəni təqdim edirik:
- Salam, Hulusi bəy. Mayın 28-i Azərbaycan tarixində həm rəmzi, həm də real mənada ikiqat bayram yaşandı. Bu barədə nə düşünürsünüz?
-28 may tarixində Azərbaycanda iki önəmli bayram qeyd olundu. Birinci bayram – Azərbaycan Xalq Cümhuriyyətinin yaranmasının 107-ci ildönümü münasibətilə Müstəqillik Günü idi. Bu əlamətdar gün ölkə boyunca böyük coşqu ilə qeyd edildi. İkinci önəmli hadisə isə – Laçın Beynəlxalq Hava Limanının açılışı idi. Bu, həm də laçınlıların dünya ilə birləşdiyi mühüm və rəmzi tədbirə çevrildi. Laçında açılan yeni hava limanı bütün azərbaycanlılara böyük sevinc və qürur yaşatdı. Hər kəs bayram sevinci içində idi.
-Laçın Beynəlxalq Hava Limanının açılışını xüsusi edən nə idi?
-Unutmayaq ki, Laçın 30 il ərməni işğalı altında qalmışdı. Lakin Azərbaycanın güclü lideri və ordusunun müdrik siyasəti nəticəsində Laçın bir güllə belə atılmadan azad edildi.
Azərbaycan, Türkiyə və Pakistan liderləri Müstəqillik Günü münasibətilə Laçında bir araya gəldilər və burada Laçın Beynəlxalq Hava Limanının açılışını etdilər. Qarabağ müharibəsi zamanı həm Türkiyə, həm də Pakistan Azərbaycana mənəvi, siyasi və diplomatik dəstək göstərmişdi. Prezident İlham Əliyev də hər iki ölkənin əsl dost və qardaş olduğunu qiymətləndirərək, onların liderlərini bu mühüm açılışa dəvət etdi.
Bu münasibətlə Laçında Türkiyə-Azərbaycan-Pakistan arasında ikinci Zirvə Görüşü də keçirildi.
-Bu Zirvə Görüşünün Laçında keçirilməsi ilə dünyaya verilən əsas mesaj nə idi?
-Bu görüş zamanı dünyaya verilən əsas mesaj üç qardaş ölkə arasındakı birlik və əməkdaşlıq idi. Bu mesaj heç bir ölkəyə qarşı yönəlməyib. Sadəcə üç dost və qardaş xalqın birliyi, həmrəyliyi nümayiş olundu. Birlik gücdür və bu birlik vasitəsilə Azərbaycan, Türkiyə və Pakistan öz gücünü, həmrəyliyini dünyaya göstərdi. Yeni dünya nizamında bu üç ölkənin gücünü birləşdirməsi strateji baxımdan olduqca əhəmiyyətlidir. Zirvə görüşünün Laçında keçirilməsinin əsas səbəbi isə dəniz səviyyəsindən 1700 metr yüksəklikdə, dağlar qoynunda salınan beynəlxalq hava limanının möhtəşəmliyini və strateji əhəmiyyətini bir daha dünyaya göstərmək idi. Həmçinin bu tədbirdə Laçın Beynəlxalq Hava Limanının insanlığa xidmətə tam hazır olduğu bəyan edildi. Üç ölkə liderinin bu açılışda iştirakı isə dünyanın diqqətini bölgəyə yönəltdi.
Beləliklə, eyni gündə həm bayram qeyd olundu, həm hava limanının açılışı oldu, həm də güclü üçlüyün – Azərbaycan, Türkiyə və Pakistanın – ikinci Zirvə Görüşü keçirildi.
-Azərbaycan-Türkiyə-Pakistan arasında hansı sahələrdə əməkdaşlıq perspektivləri mövcuddur?
-Bu ölkələr əsasən hərbi sahədə əməkdaşlığı daha da genişləndirə bilərlər. Hazırda birgə hərbi təlimlər keçirilir. Gələcəkdə müdafiə sənayesinin inkişafı istiqamətində əməkdaşlıq da mümkündür. Pakistan nüvə silahına malik olan böyük, güclü dövlətdir və texnoloji baxımdan yüksək inkişaf səviyyəsinə malikdir. Eyni zamanda Türkiyənin müdafiə sənayesindəki irəliləyişi və gücü bütün dünyanın diqqətini cəlb edir. Azərbaycanın da bu sahədə təcrübəsi artmaqdadır. Bu üç ölkə müdafiə sahəsindəki bilik və təcrübələrini birləşdirəcək. Bütün bunlar heç bir dövlətə qarşı yönəlməyib. Məqsəd yalnız dünyada baş verən proseslərə uyğun olaraq qarşılıqlı əməkdaşlıq və müdafiə gücünü artırmaqdır.
-Sözügedən üçlüyün yaxınlaşması digər türk və İslam ölkələri tərəfindən necə qarşılanır?
-Üçlü ittifaq – Azərbaycan, Türkiyə və Pakistan – dostluq və qardaşlıqdan doğan əməkdaşlığın nümunəsidir. Laçında keçirilən görüş təkcə bu üç ölkənin deyil, bütün türk və İslam dünyasının qürur mənbəyinə çevrildi.
Türkiyənin gücü Azərbaycanın gücüdür. Eyni şəkildə digər qardaş ölkələr də istənilən vaxt bu üçlü birlikdə yer ala bilərlər. Laçında keçirilən bu zirvə görüşü daimi xarakter daşıyır və gələcəkdə də davam etdirilməsi planlaşdırılır.
-İşğaldan azad edilmiş ərazilərdə yeni infrastrukturun və hava limanlarının yaradılmasını necə dəyərləndirirsiniz?
-Qarabağda artıq üç beynəlxalq hava limanı istifadəyə verilib – birincisi Füzulidə, ikincisi Zəngilanda, üçüncüsü isə Laçında. Beləliklə, dünya 5 ildən az müddətdə Azərbaycanın işğaldan azad olunmuş ərazilərində üç beynəlxalq hava limanı inşa etdiyinin şahidi oldu. Bu hava limanları həm turizmin inkişafına, həm də xarici bazarlara məhsul ixracına töhfə verəcək. Hava yolu xalqın yoludur, hava yolu insanlığın yoludur.
