ABŞ-nin yeni seçilmiş prezidenti Donald Tramp şəhəri tərk etdikdən 4 il sonra prezident kimi ikinci andiçmə mərasimi ilə bağlı təmtəraqlı mərasimlərdə iştirak üçün Vaşinqtona gedib.
“Cebheinfo.az” xəbər verir ki, onun təyyarəsi axşam saatlarında Dulles hava limanına enib. Daha sonra planlaşdırılmış axşam şənlikləri və atəşfəşanlıq üçün Tramp Sterling Qolf Klubuna yollanıb. Jurnalistlərin dediyinə görə, Tramp saat 19:20 radələrində təyyarədən enib və suallara cavab verməyib, ancaq mətbuata əl yelləmək üçün qısa müddətə dayanıb və yumruğunu iki dəfə havaya qaldırıb.
Tramp, Melaniya və oğulları Barron saat 17:13-də təyyarəyə minərək, Mar-a-Laqo yaxınlığındakı Palm-Biç Beynəlxalq Hava Limanından yola düşüblər.
İnauqurasiya günündə ölkənin paytaxtına şaxtalı temperatur gözlənilir. Eyni zamanda, gözlənilən Arktika küləyi təşkilatçıları bazar ertəsi andiçmə mərasimi də daxil olmaqla, açıq hava tədbirlərinin çoxunu təxirə salmağa məcbur edib.
İnauqurasiya mərasimlərində və tədbirlərdə Country musiqisinin ulduzları Kerri Andervud, Billi Rey Sayrus və Ceyson Aldean, “Village People” diskoteka qrupu, reper Nelli və musiqiçi Kid Rok çıxış edəcəklər. Aktyor Con Voight və güləşçi Hulk Hoqanın, həmçinin Tramp tərəfdarı olan iş adamlarından ibarət komandanın çıxış edəcəyi gözlənilir. Bura “Tesla” və “X” şirkətinin baş direktoru İlon Mask, “Amazon” qurucusu Ceff Bezos, “Meta”-nın baş direktoru Mark Zukerberq və “TikTok”-un baş direktoru Şou Zi Çu daxildir.
Trampın cədvəlindəki yeganə ictimai tədbir Virciniya ştatının Sterlinq şəhərindəki Tramp Milli Qolf Klubunda axşam qəbulu və atəşfəşanlıqdır.
Tramp öz klubunda görüş keçirərkən, vitse-prezident seçilmiş J.D.Vens Vaşinqtonda Nazirlər Kabineti üzvləri üçün ziyafətdə iştirak edəcək və şam yeməyi verəcək.
Bazar günü, inauqurasiyadan bir gün əvvəl Tramp Arlinqton Milli Qəbiristanlığında əklil qoyma mərasimində iştirak etməyi və daha sonra Vaşinqtondakı Capital One Arenadakı mitinqə getməyi planlaşdırır. Mitinqdən sonra xüsusi şam yeməyi olacaq. Tramp vəzifəsini tərk edən prezident və birinci xanımla ənənəvi çay süfrəsi üçün Ağ Evə getməzdən əvvəl İnauqurasiya Gününə Müqəddəs Con Yepiskop Kilsəsində ənənəvi ayinlə başlayacaq.
Tramp daha sonra inaqurasiya mərasiminin qapalı məkanda keçiriləcəyi Kapitoliyə yollanacaq.
Cəmi 600 nəfərlik Kapitol Rotundada mərasimin necə keçiriləcəyi bəlli deyil. 250.000-dən çox qonaq Kapitolinin hər yerindən inaqurasiyanı izləmək üçün bilet alıb. Tədbirin planlaşdırılmasına cavabdeh olan Açılış Mərasimləri üzrə Birgə Konqres Komitəsi açıqlamasında bildirib ki, bilet alan qonaqların böyük əksəriyyəti mərasimdə şəxsən iştirak edə bilməyəcək.
