Neftçilərin Hüquqlarının Müdafiəsi Təşkilatının (NHMT) sədri Mirvari Qəhrəmanlı bir neçə gün öncə SOCAR rəhbərliyinə və İqtisadiyyat naziri Mikayıl Cabbarova müraciət edərək yenidən neftçilərin maaşlarının artırılması məsələsini gündəmə gətirmiş oldu.
"DİA-AZ" xəbər verir ki, NHMT sədrinin etdiyi çağırış sosial şəbəkələrdə geniş müzakirə olunub. Biz də mövzunun aktuallığını nəzərə alaraq həmin müzakirələr zamanı diqqətimizi cəlb edən maraqlı bir rəyi oxucularımızla bölüşürük.
Rac Kərimov adlı SOCAR əməkdaşı olduqca ilginc formada neftçilərin maaşlarının artırılması məsələsinin zəruri olduğunu əsaslandırır. O bildirib:
"Bu yaxınlarda neftçilərin yemək pulunu artırdılar. Yəqin ki, bunu səbəbsiz etmədilər.
Çünki ərzaqların qiymətində bahalaşma var idi...
Bəs mənə bir şey çatmır ki, sən neftçinin yemək pulunu qaldıranda fikirləşmədin ki, bunun evdə ailəsi, külfəti var?! Ərzaq qiymətinin artımı varsa, demək ki sən təkcə neftçinin yemək xərcini yox, həm də onun ümumi əməkhaqqısını qaldırmalı idin...
Çünki o həmin maaşla ailə saxlayır. Səninki belə çıxır ki, neftçi özü işdə olanda yesin, amma evdəkilər oruc tutsun... Yoxsa necə?
Hələ digər sahələrdəki qiymət artımını demirəm..."
Yəni anlaşılan odur ki, işdə neftçilərin yemək pulunu ona görə artırırlar ki, həmin pul onlar üçün həm də yeyinti imkanı yaradır. Neftçilərin öz maaşlarına gəlincə isə bu kimisə maraqlandırmır...
