“Şükür Allaha özümü çox yaxşı hiss edirəm. Bilgəh Kardioloji Sanatoriyasında müalicə alıram. Bu gün artıq evə buraxılıram. Burada mənə çox diqqət və qayğı var. Tələbələrim də yanıma gəlir, mənə baş çəkirlər. Dövlətimdən də, insanlardan da çox razıyam. Allah onları qorusun”
Bunu Moderator.az-a açıqlamasında xalq artisti Arif Babayev deyib. Sənətkar daha sonra Leyli və Məcnun rollarına görə bəzi insanların tənqid etdikləri xalq artistləri Mənsum İbrahimov və Nəzakət Teymurova haqqında da danışıb:
“Nə Nəzakət qocalmayıb, nə də Mənsum. Niyə bu obrazları oynaya bilməzlər ki? Bu sözü kim deyirsə səhv düşünür. Nəzakətin də, Mənsumun da səsi də var, görkəmi də. Niyə axı bu sözləri deyib sənətkarların xətrinə dəyirlər? Bir tamaşaçı kimi hər zaman onların tamaşalarına baxmışam. Çox yaxşı oynayırlar və tamaşaçı onları sevir. Bu obrazlar üçün yaş məsələsi yoxdur. Əsas səs və səhnə görkəmidir. Nəzakət də, Mənsum da dünyanın hansı ölkəsinə getsələr onların səslərini sevəcəklər, dinləyəcəklər. Nəzakətə də, Mənsuma da deyin ki, durmuşam onların arxasında. Bu sözləri qətiyyən ciddi qəbul etməsinlər” deyə sənətkar bildirib.
Arif Babayev vaxtilə özünün oynadığı Məcnun rolundan da danışıb.
“Mən o vaxt Məcnun rolunu 40 yaşıma kimi oynamışam. O vaxt Məcnunlar da çox idi, Leylilər də. Leylilərim də Zeynəb Xanlarova, Rübabə Muradova, Səkinə İsmayılova və s. sənətkarlar olub. Hətta bir dəfə Flora xanımla da oynamışam. Hamısı ayrı-ayrılıqda gözəl oynayıblar. Heç birini seçə bilmərəm” deyə o bildirib.