Naxçıvan Ədliyyə Nazirliyi Sədərək rayonunda aliment və pul tələbi ilə bağlı icra sənədləri üzrə borclularlı bir yerə toplayaraq, görüş keçirib. "DİA-AZ" xəbər verir ki, keçən şənbə düzənlənən görüş maarifləndirici tədbir adı altında keçirilsə də, iştirakçı borclular bunu hədə kimi qiymətləndirirlər.

İştirakçılardan S.Q. deyir ki, icraçılar heç nəyi nəzərə almadan banklara borcu olanları sıxışdırırlar:

“Mən borc götürəndə işləyirdim, sonra iş yeri bağlandı. Bnak məhkəməyə verib. Məhkəmədən möhlət istəyirəm, deyir olmaz. Neçə nəfər borcunu verə bilmədiyi üçün həbs olunub. Bizi də həbslə hədələyirlər. İndi də maarifləndirici tədbir altında hamımızı yığıb, eyni şeyləri xatırladırlar. Bunların əlindən neçə nəfər intihar edib. Bir hərbçi də ötən həftə özünü asdı. Çünki, banka olan borcunu verə bilmədiyindən icraçılar onu həbslə hədələyirdilər.”

Nazirlik də rəsmi məlumatında bildirir ki, tədbirin məqsədi borcla bağlı qərarları yerinə yetirməyən vətəndaşlara qarşı görüləcək tədbirləri xatırlatmaqdır:

“Tədbirlərin əsas məqsədi məhkəmə və digər orqanların qərarlarının icrasının vaxtında təmin olunması, icra məmurunun qanuni tələblərini yerinə yetirməyən borclu və məhkumların məsuliyyətə cəlb edilməsi və vətəndaşların hüquqlarının qorunmasıdır.“