Kəngərli rayonunda zorlanmış şagird F.M. ictimai qınaqdan sonra qovulduğu məktəbə bərpa olunub. Bu haqda „Gündəlik Naxçıvan“a şagirdin atası Novruz Musayev məlumat verib. Onun sözlərinə görə, oğlu təhsilinin ötən il qovulduğu Qıvraq qəsəbə orta məktəbində davam etdirəcək.

Novruz Musayev bundan öncə „Gündəlik Naxçıvan“a bildirmişdi ki, 3 hərbçi bir neçə ay öncə onun 14 yaşlı oğlunu zorlayıb. Bundan sonra o, mobbinqə məruz qalıb və məktəbdən qovulub.

Atanın sözlərinə görə, məsələ ictimailəşdikdən sonra elə, uşağını sinifdən qovan direktor özü onları məktəbə dəvət edib. Musayevin sözlərinə görə, psixoloji travma almış uşağa məktəbdə xüsusi psixoloq da ayrılıb:

“Məsələyə yerli icra hakimiyyəti və təhsil şöbəsi qarışıb. Halbuki, bir ildir döymədiyimiz qapı qalmamışdı, deyirdilər ki, zorlanmış uşağa Naxçıvan məktəblərində yer yoxdur.

Bu dəfə, sentyabrın 18-də isə, bizi məktəbdə çox yaxşı, çox mehriban qarşıladılar. İcra hakimiyyətindən nümayəndələr, təhsil şöbəsinin müdiri şəxsən bizimlə görüşə gəlmişdi. Uşaqla söhbət etdilər, könlünü aldılar. Məktəbdəki bütün siniflərlə söhbət aparıb, şagirdlərə tapşırıblar ki, heç bir uşaq oğlumu buillinq etməyəcək. Yenə də sağ olsunlar, gec reaksiya versələr belə.

Ayrılmış psixoloq uşaqla söhbətlər aparıb, onun psixoloji travmasını öyrənib, travmanı aradan qaldırmağa çalışacaq. Bütün bunlar bizim ailəyə edilən ictimai dəstəyin sayəsində baş verdi. Bizim yanımızda duran hər kəsə ailəm adından təşəkkür edirəm. Sevincimizin həddi-hüdudu yoxdur”

Lakin, oğlunu zorlayanlardan birinin hələ də azadlıqda olması atanın sevincini yarımçıq qoyur:

“Bir tərəfdən sevinc içindəyik ki, uşaq bir il sonra məktəbə bərpa olundu. Digər tərəfdən isə narahatıq. Oğlumun təhsil aldığı məktəb qonşu kənddədir və o, bir neçə kilometr tək piyada getməli olacaq. Təcavüzkarlardan biri hələ də azadlıqdadır. Qorxuruq ki, yolda uşağa yenə təcavüz edər. Bu səbəbdən məcburam ki, uşağı hər gün özüm məktəbə aparıb-gətirəm.

Digər təcavüzçülər də layiqli cəza almayıblar. Hərbi məhkəmə onların birinə 9 ay, digərinə isə 1 il iş kəsib. Birazdan onlar da azadlığa buraxılacaqlar. Mən ümid edirəm ki, aidiyyəti orqanlar bu işə də qarışacaqlar və cinayət işinə yenidən baxılacaq, təcavüzkarlar layiqli cəzalarını alacaqlar.”