Vaşinqtonda əldə olunan sülh razılaşmaları Cənubi Qafqazda yeni ümidlər yaratsa da, regionda geosiyasi gərginliklər hələ də davam edir. Görünür ki, Rusiya Vaşinqtonda imzalanan sülh razılaşmalarını qəbul etmir.
Qeyd edək ki, həm dünya, həm bölgə ölkələri Azərbaycan-Ermənistan arasında sülhün paraflanmasını, məlum bəyannaməni dəstəklədiklırini açıqladılar, təbrik etdilər. Rusiya rəhbərliyindən isə hələ də Azərbaycan və Ermənistana təbrik gəlməyib.
Mövzu ilə bağlı Redaktor.az-a açıqlama verən politoloq Aqşin Kərimov bildirdi ki, Rusiya Azərbaycan və Ermənistan arasında Vaşinqtonda Donald Trampın vasitəçiliyi ilə əldə edilmiş razılaşmaları və ondan irəli gələn öhdəlikləri sabotaj etmək üçün müxtəlif vasitələrə əl ata bilər:
"Rusiyanın mövcud informasiya və analitik məkanının təhlili, göstərir ki, Kreml bu istiqamətdə artıq müəyyən təlimatlar verib. Kremldən gələn açıqlamalar və bunun mediada əks-sədası belə düşünməyə əsas verir ki, Rusiya hazırkı sülh planından razı deyil. Ehtimal olunur ki, Moskva Vaşinqton razılaşmalarını üstələyəcək alternativ təkliflər paketi hazırlamağa çalışacaq, lakin bunu necə həyata keçirə biləcəyi sual altındadır. Çünki Rusiyanın "sülh" planının özü şübhəlidir. Ona görə də Rusiya Azərbaycana qarşı təzyiq vasitələrini işə sala, Rusiyadakı vətəndaşlarımıza və soydaşlarımıza qarşı müəyyən tədbirlər həyata keçirə bilər. Digər tərəfdən, yaxın günlərdə - 15 avqustda Alyaskada Donald Tramp və Vladimir Putin arasında görüş planlaşdırılır. Bu görüşün nəticələri Cənubi Qafqaz, postsovet məkanı və Yaxın Şərq üzrə mümkün bölgülərə təsir göstərə, həmçinin Rusiyanın Azərbaycan-Ermənistan məsələsinə münasibətini formalaşdıra bilər. Əgər Tramp-Putin razılaşması baş tutmasa, Rusiya Cənubi Qafqazda daha aqressiv siyasət yürüdə bilər".
Onun sözlərinə görə, Rusiyanın əsas diqqət yönləndirəcəyi ölkə Ermənistan olacaq:
"Bu yolla Rusiya Ermənistanı təsir dairəsində saxlamağa və onu Azərbaycana qarşı təxribatlara hazırlamağa cəhd edə bilər. Lakin Ukraynadakı müharibə kampaniyası səbəbindən Rusiyanın geosiyasi gücü əvvəlki səviyyədə deyil və mövqelərində geriləmə müşahidə olunur. Məhz bu səbəbdən Rusiyanın hansı alternativ addımlar ata biləcəyi diqqət mərkəzində olmalıdır".
