Yanvar-iyul aylarında Rusiyanın Sverdlovsk vilayətindən təxminən 1000 miqrant deportasiya edilib.
Bu barədə “Tagilcity.ru” məlumat yayıb.
Deportasiya edilənlərin əksəriyyəti Mərkəzi Asiya ölkələrinin vətəndaşlarıdır. Belə ki, göstərilən müddət ərzində Tacikistandan 400-dən çox, Özbəkistandan 300-ə yaxın və Qırğızıstandan 130-dan çox qeyri-qanuni mühacir vətənə göndərilib.
Deportasiya edilənlər siyahısında 33 azərbaycanlı da var. Gürcüstan, Misir və Çindən olan azsaylı xarici vətəndaşlar da (1 nəfərdən 6 nəfərə qədər) rayon ərazisini tərk etmək məcburiyyətində qalıb.
İdarədən verilən məlumata görə, deportasiya edilən şəxslərin hamısı Rusiyaya işə düzəlmək məqsədi ilə gəlsələr də, qanuni əsas olmadan ölkədə olublar.
Onlar deportasiya prosedurunu gözləmə müddətini xarici vətəndaşların müvəqqəti saxlanması üçün ixtisaslaşmış mərkəzlərdə keçiriblər.Qeyd edək ki, son vaxtlar Rusiyada miqrantlara qarşı tədbirlər daha da genişləndirilib.
Mövcud Rusiya-Azərbaycan münasibətləri, orada yaşayan azərbaycanlıların ölkədən çıxarılmasını sürətləndirə bilərmi?
Məsələ ilə bağlı millət vəkili Azər Allahverənov “Cebheinfo.az”-a bildirib ki, Rusiyada ötən ilin mart-aprel ayından etibarən sərt şəkildə qanunsuz miqrantlara qarşı tədbirlər həyata keçirirlər:
“Onların aşkarlanması, deportasiya olunması ilə paralel olaraq Rusiya hökuməti qanunvericilikdə bir sıra dəyişikliklər etdilər. Hətta dəyişikliklər müəyyən mənada sərtləşdirilmə kimi dəyərləndirilə bilər. Bunun da nəticəsi olaraq ölkə ərazisində Rusiya Daxili İşlər Nazirliyinin ötən ilin noyabrına verdiyi məlumata əsasən, 1 milyon 200 min qanunsuz miqrant ölkə ərazisində yaşayır.
Onun təqribən 8 faizini, 100 min nəfərini azərbaycanlı miqrantlar təşkil edir. Ondan sonra Rusiya silsilə tədbirlər nəticəsində, xüsusilə də bu ilin yanvar-fevral ayından etibarən qanunsuz miqrantların aşkarlanmsı ilə bağlı genişmiqyaslı tədbirlər həyata keçirdilər.
Nəticədə isə rəsmi elan edilən məlumata görə, 1 milyon 200 min qanunsuz miqrantın sayında çox ciddi azalma müşahidə olunur. Bu da eyni zamanda azərbaycanlı miqrantların sayında özünü göstərir.
Bu ilin fevral-mart ayında 20-30 min qanunsuz azərbaycanlı miqrantın çıxarılması barədə məlumat verilmişdi. Təxmin etmək olar ki, bu ilin II rübünə ölkə ərazisində olan qanunsuz miqrantların arasında azərbaycanlıların sayı 70-80 min nəfər olmalıdır.
Bundan sonra da azalmalar müşahidə olunmaqdadır. Çünki orada qaydalar qoyublar ki, ölkə ərazisini könüllü şəkildə tərk edərlərsə, onlara qarşı sərt qaydalar tətbiq olunmayacaq.
Bunun hamısı kifayət qədər öz təsirini göstərir. İyun ayına qədər çox sayda azərbaycanlı ölkə ərazisini tərk edib”.
Millət vəkilinin sözlərinə görə, təbii ki, indi Rusiya-Azərbaycan münasibətlərinin müəyyən mənada soyuqlaşması fonunda da bu dəyərləndirilə biləcək bir proses kimi görünə bilər:
“Ancaq bütövlükdə Rusiya hökuməti qanunsuz miqrasiya ilə bağlı çox sərt tədbirlər həyata keçirməkdədir. Siyasətin özü kifayət qədər sərtdir. Bir sıra şəhərlərdə belə, hətta qanunsuz miqrantların aşkarlanması ilə bağlı həyata keçirilən tədbirlər genişmiqyaslı kimi də dəyərləndirilə bilər.
Rusiya hökuməti bəzi hallarda siyasi rıçaq kimi miqrant mövzusundan istifadə edə bilər. Biz bunu zaman-zaman, son bir neçə ildə görümüşük ki, hansısa ölkə ilə münasibətlər soyuqlaşanda dərhal həmin ölkələrdən olan miqrantlarla bağlı daha sərt qaydalar tətbiq olunur.
Ancaq bu gün Rusiyada miqrantlarla bağlı tətbiq edilən qaydalar, bu istiqamətdə irəli sürülən yeni təkliflər bütövlükdə bu siyasətin sərtləşdirilməsinə yönəlib.
Nəticə etibarilə ölkə ərazisində olan miqrantları, xüsusilə də qanunsuz əsaslarla yaşayanlara birbaşa olaraq toxunan məsələdir və düşünürəm ki, bu siyasət hələki davam etdirilməkdədir”.
