Pirşağı sahilinə yığılmış qağayı dəstəsi gözəl görüntü versə də, bu mənzərə dənizə məişət tullantılarının axıdılmasından xəbər verir.

Xəzər qağayıları əsasən Xəzər və Qaradəniz hövzəsi ərazilərində müşahidə edilir. Xəzər dənizində qağayılar balıqlarla qidalanır, yuva qurur və çoxalırlar. Deyirlər ki, son zamanlar qağayıların sayında azalma müşahidə edilir. Buna səbəb dənizin çirklənməsidir.

Dəniz sahilində payız və qış aylarında daha çox qağayı olur. Bunun bir neçə səbəbi var. İlk səbəbi odur ki, Xəzər dənizi qağayılar üçün əhəmiyyətli qışlama ərazisidir. Payız miqrasiyası adətən avqustun ikinci yarısından başlayır və dekabrın ikinci ongünlüyünə kimi davam edir, ən aktiv dövr noyabr ayında olur. Onu da qeyd etmək lazımdır ki, qış aylarında Xəzər dənizi balıq ehtiyatları baxımından qağayılar üçün daha əlverişli olur. Xəzərdə qağayıların ümumi sayı payızda artmağa başlayır və qışda daha çox artır.

Qağayılar əsasən qida mənbələrinin bol olduğu yerlərə yığılırlar. Onlar tez uyğunlaşan quşlardır və müxtəlif mühitlərdə yaşaya bilirlər. Qağayılar göl və dəniz sahilində daha çox olurlar.