Ölkədə bayramlar ərəfəsində əfv sərəncamının olması bir ənənəyə çevrilib.

Builki Novruz bayramından öncə də əfv gözlənilirdi. Hətta Prezident yanında Əfv Məsələləri Komissiyasının iclasları da keçirilirdi.

Hazırda komssiyanın iclasları davam edirmi və yeni əfv sərəncamı nə vaxt olacaq?

Məsələ ilə bağlı Prezident yanında Əfv Məsələləri Komissiyasının üzvü Əliməmməd Nuriyev "Cebheinfo.az"-a bildirib ki, fevral ayının 12-dən iclaslar başlayıb və artıq 4 iclas olub:

"İclaslarımız növbəti aylarda da davam edəcək. İndiyədək 400-dən artıq müraciətə baxılıb. Konkret kimlərin müraciətinə baxıldığını açıqlamaq qanunvericiliyin pozulması ilə nəticələnə bilər. Bunlar şəxsi məlumatlardır. Eyni zamanda, müzakirələr gedir.

Əfv Komissiyası hər hansı yekun qərar qəbul etmək hüququna malik deyil. Onun mandatı ancaq müraciətlərə baxıb müvafiq rəylərin hazırlanması barədə qərar qəbul etməkdir. Əfv sərəncamı Prezident tərəfindən imzalana bilər. Çünki bu, cənab Prezidentin müstəsna olaraq konstitusion səlahiyyətidir. Kimin əfv olunub-olunmayacağı ilə bağlı son qərar Prezidentindir. Hər hansı şəxs haqqında müzakirələrin olması barədə məlumat həm şəxsi məlumatlardır".

O bildirib ki, hər hansı məlumatın açıqlanması etik qaydalara uyğun olmaz:

"Ona görə başa çatmamış bir iş haqqında məlumatın verilməsi doğru deyil".

Bu bayramda əfvin olmamasına gəldikdə isə Ə.Nuriyev bildirdi ki, hələ iclaslar davam edir:

"Gərək müzakirələr başa çatsın, bütün rəylər cənab Prezidentə təqdim olunsun. Bu il "Konstitusiya və Suverenlik İli" elan edilib. Yəqin ki, bu münasibətlə də ola bilər. Ancaq yenə də bu barədə birmənalı söz demək çətindir. May ayında olması ehtimal edilən variantlardan biridir".