Azərbaycan və Ermənistan arasında imzalanacaq sülh müqaviləsi ətrafında sular durulmur. Bir müddətdir, xüsusilə məkan və vaxt məsələsi müzakirə obyektidir.

Globalinfo.az xəbər verir ki, bu barədə həm rəsmi məlumatlar açıqlanır, həm də iddialar səsləndirilir.

Bu konteksdə Ermənistanın Təhlükəsizlik Şurasının katibi Armen Qriqoryanın son çıxışı diqqət çəkib.

O bildirib ki, Bakı ilə müqavilənin imzalanma yeri və vaxtı hələ müzakirə olunmayıb.

“Başa düşürəm ki, sazişə ictimai maraq var. Lakin hələlik işimizi davam etdiririk. Bu, vəziyyətə diplomatik yanaşmadır. Ermənistan imzalanma üçün konkret yerlər təklif etməyib.Bununla belə, hansısa balanslaşdırılmış variantı seçmək məntiqli olardı”, – deyə Qriqoryan bildirib.

Ardınca Rusiya tərəfindən maraqlı açıqlama gəlib. Belə ki, Rusiya Xarici İşlər Nazirliyinin rəsmisi Mariya Zaxarova Moskvanın 9 May Qələbə Gününə həsr olunmuş tədbirlərdə Azərbaycan Prezidenti İlham Əliyev və Ermənistanın Baş naziri Nikol Paşinyanı gözlədiyini deyib:

“Biz bunu alqışlayırıq. Həm Azərbaycan, həm də Ermənistan rəhbərliyini gözləyirik. Bu əlamətdar və birləşdirici tarixin layiqli qeyd olunması üçün bütün istiqamətlərdə genişmiqyaslı hazırlıq işləri aparılır”.

Zaxarovanın bu çıxışı birmənalı qarşılanmayıb. Hətta bəzi ekspertlər “Moskva hər iki lideri gözləyir”, fikirlərinin mümkün sülh sazişinə işarə olduğunu iddia edib. Düşünülür ki, məhz 9 mayda Azərbaycan Prezidenti və Ermənistan Baş naziri Rusiyanın vasitəçiliyi ilə müqaviləyə imza ata bilər. Digər tərəfdən, son günlər rəsmi İrəvanın Moskva ilə əlaqələrini yaxşılaşdırmaq üçün atdığı addımlar ehtimalın reallığını ön plana çıxarır. Ekspertlərin fikrincə, Ermənistan baş naziri bağışlanılmaq üçün bu tarixi fürsəti əldən verməyəcək.

Paralel olaraq, fərqli mövqedə olanlar da var. Məsələn, erməni politoloq Argişti Kiviryan iddia edir ki, Paşinyanın Bakıya getməsi və sülh müqaviləsini Azərbaycanın paytaxtında imzalanması tələbi qoyulub. Onun sözlərinə görə, bu, Ermənistanın son kapitulyasiyaya imza atması planının bir hissəsidir.

“Paşinyan sülh sazişinin mayın 9-da Moskvada Rusiyanın vasitəçiliyi ilə imzalanmasına çalışıb. Bu, Rusiya üçün böyük hədiyyə olardı. Putin və Paşinyanın telefon söhbətindən sonra Matvienkonun Bakıya səfəri də bu məsələni müzakirə etmək məqsədi daşıyıb. Lakin Azərbaycanın tələbi Paşinyanın Bakıda müqaviləyə imza atmasıdır”, – deyə o bildirib.

Xatırladaq ki, martın 13-də İrəvan və Bakının qalan iki bənd üzrə razılığa gələrək, sülh müqaviləsinin mətninin razılaşdırılması üzrə danışıqları başa çatdırdıqları məlum olub.