“Gör bunlar necə qudurub ki, bir müddət əvvəl ortaya çıxardığım fake sujeti yenidən gündəmə gətiriblər. Redaktor Vüsalə Əlibəylinin (“Azadlıq” radiosunun Azərbaycan xidmətinin redaktoru - red.) sifətində ar yox, həya yox”.
“Yeni Sabah” xəbər verir ki, bunu adıçəkilən radionun keçmiş əməkdaşı, jurnalist İslam Şıxəli sosial şəbəkə hesabında yazıb.
O, “Azadlıq” radiosunun Azərbaycanın bəzi bölgələrində 9-11-ci siniflərdə təhsil alan qızların sayının azalması ilə bağlı reportajından foto paylaşıb. İ.Şıxəli bildirib ki, reportajı “Azadlıq” radiosunun işçisi Ləman Qasımova hazırlayıb: “O iş yoldaşlarından rəhbərliyə satqınlıqları ilə, Vüsalə Əlibəyliyə ən yüksək səviyyədə yaltaqlığı ilə tanınır.
Ləmanın fəaliyyəti nəticəsində həmin iş yoldaşları işdən qovulub və indi həbs həyatı yaşayırlar, O isə hırla-zırı qanmadan “Azadlıq” radiosunda işinin başındadır. (İndi onun reportajlarını əslində kimin yazdığını demirəm, qoy redaktorunun ürəyi partlasın. Siz də soruşmayın, ismini deməyəcəm.)
Vüsalənin şərləyərək işdən çıxardığı adamların yazdığı tək bir vergül Ləman Qasımovanın bütün kariyerasından daha güclüdür.
Reportajda danışan çadralı qız isə Anews saytında işləyən Aytac Zeynalovadır.
Bağışlayın məni, saxta qəhrəmanla yalançı sujet hazırlayanda adamın ifşa olunacağını da nəzərə almaq lazım idi.
Mən onlara şans verdim, əvvəlki paylaşımlarda ad çəkmədim, adamın kimliyini açıb ağartmadım. Amma onlar abırlarına qısılıb reportajı silmək yerinə, əməkdaşla münasibəti gözdən keçirmək yerinə, bir az da artıq gözə soxurlar.
Yazda bəzi məsələləri aydınlaşdırmaq üçün Ləmanla Sarajevoda görüşdüm. Gözümün içinə baxaraq bu qızın Aytac olduğunu inkar etdi və başqa bir çox mövzuda 342364567 dənə yalan danışdı. Halbuki, Aytacın müsahibə verdiyi bu evi də tanıyanlar var, Allah qapılarını açsın.
Mən də çörəyi qulağıma yemirəm axı.
Radio bir neçə dəfə daxildə bu məsələ ilə bağlı mövqeyini bildirib, redaktor Vüsalə Əlibəyli əməkdaşına inandığını deyib. Araşdırmadan, qəhrəmanın özünə çıxmadan. Vüsalə bilərək hamıya meydan oxuyur.
Videoda danışan qəhrəmanımız da onun özü olduğunu inkar edib. Başqa necə olmalı idi ki?
Xalqın gözü tərəzidir.
İzləyicilər baxıb qərar versin, burada danışan adam həqiqətən abort etdirən mömin qadındır, yoxsa linkini yerləşdirdiyim jurnalist?”.
