“Övladım ali təhsil ocağına qəbul olub. 2 gündür ki, mən ona sağlamlıq haqqında arayış ala bilmirəm. Xəzər rayonu, Binə qəsəbəsində yerləşən 29 saylı Birləşmiş Şəhər Xəstəxanasına gedirəm. O qədər növbə var ki.. Tək mən yox, ümumiyyətlə heç kim yaxın dura bilmir. Millət bir-biri ilə dava-qırğın edir. Əksər hallarda da deyirlər ki, “sistem çöküb”. Hələ ötən dəfə rentgen olunmaq üçün səhər saat 7-dən növbə götürmüşdük. Həkim çıxıb dedi ki, “mənim iş saatım bitdi, evə gedirəm”. Təsəvvür edin ki, insanlar növbə gözləyə-gözləyə həkim çıxıb evə getdi”

Bunu Moderator.az -a şikayətçi Könül Manaflı deyib. O tək bu gün yox, əksər hallarda poliklinikada vəziyyətin acınacaqlı olduğunu bildirib.

Analoji vəziyyətlə əksər xəstəxana və poliklinikalarda qarşılaşırıq. Bəs görəsən vəziyyətdən çıxış yolu nədir? Azərbaycan Tibb Universitetinin dosenti, fizioloq, tibb üzrə fəlsəfə doktoru Rəşid Mahmudov Moderator.az-a açıqlamasında bildirib ki, bu kimi hallar mətbuatda işıqlandırılmalıdır və bəlkə bundan sonra məsələ öz həllini tapar:

“İstəsələr buna bir çarə qıla bilərlər. Mənim əlimdən vallah bir şey gəlmir. Mən ki, nazir deyiləm. Bu işlərə nazir baxır. Bu sualı onlara verin ki, niyə belə etdiniz? Siz jurnalistlər, araşdırın, işıqlandırın. Məni tanıyırlar, hər yerdə də hörmət edirlər, qəbul edirlər. İndi hamı Rəşid Mahmudov deyil ki. Bu qədər söz deyirəm, mövzularda danışıram. Kimlər ağıllanır? Hər kəs öz bildiyini edir. Əlbəttə ki, insanları incitmək olmaz. Onların əksəriyyəti xəstədir, ayaq üstə dura bilmir. İnsanlar həkimə uman-guman yeri kimi baxır. Bununla bağlı problemlər və şikayətlər çoxdur. Əlbəttə ki, məsələ öz həllini tapsa hər kəs məmnun qalar” deyə o bildirib.