Paytaxtın Binəqədi rayon bələdiyyəsinin keçmiş sədri Aytac Əliyeva və bacısı İlknur Əliyevanın (Turkut) barəsindəki qərardan verilən kassasiya şikayəti verilib.

Pravda.az-ın əldə etdiyi məlumata görə, şikayət Ali Məhkəmənin Hafiz Nəsibovun sədrliyi ilə araşdırılacaq.

Qeyd: Binəqədi rayon bələdiyyəsinin keçmiş sədri Aytac Əliyeva bacısı İlknur Əliyeva (Turkut) ilə birgə qızıl alveri etmək məqsədilə vətəndaşlara qarşı 1 milyon manata yaxın dələduzluqda təqsirləndirilirlər.

Onlar barəsində Cinayət Məcəlləsinin 178.3.2-ci (Dələduzluq, külli miqdarda ziyan vurmaqla törədildikdə) maddəsi ilə cinayət işi başlanılaraq barələrində həbs qətimkan tədbiri seçilmişdi.

İttiham olunan İlknur Əliyeva bir müddət əvvəl ev dustaqlığına buraxılmışdı.

Bakı Ağır Cinayətlər Məhkəməsinin hökmü ilə Aytac Əliyeva 7 il müddətinə, İlknur Turkut isə 6 il müddətinə azadlıqdan məhrum edilib. İlknur Turkut məhkəmə zalında həbs olunub. Hökmdə qeyd olunub ki, Aytac Əliyeva 3 il dövlət işində çalışa bilməz. Bakı Apellyasiya Məhkəməsinin qərarına əsasən, təqsirləndirilən şəxslərin apellyasiya şikayətləri təmin edilməyib, Bakı Ağır Cinayətlər Məhkəməsinin 05 dekabr 2023-cü il tarixli hökmü zərərçəkmiş şəxsin mülki iddiasına aid hissədə dəyişdirilib. Zərərçəkmiş şəxsə vurulmuş 189 500 manat ziyan, 494 manat dövlət rüsumu və 5 000 manat mənəvi ziyanın – ümumilikdə 194 994 manat müştərək qaydada təqsirləndirilən şəxslərdən zərərçəkmişin xeyrinə tutulması barədə qərar qəbul edilib. Hökm qalan hissələrdə apellyasiya şikayətlərinə və əlavələrə münasibətdə dəyişdirilmədən saxlanılıb.

Xatırlatma: Bir müddət əvvəl Binəqədi Rayon Məhkəməsinin hökmü ilə İlknur Turkuta hökm oxunub. Hazırda həbsdə olan İlknur Turkutun cəzası birləşdirilib və o, qəti olaraq 6 il 6 ay müddətinə azadlıqdan məhrum edilib.

İttihama görə, İlknur Turkut zərərçəkmiş Şirin Abbasova oğlunu həbsdən çıxara biləcəyi barədə yalan vəd verib, məhkəmə istintaqı davam edən işi həll etmək üçün zərərçəkmişdən 15 min manat pul alıb.