Türkiyəli aktyor Oktay Kaynarca "Biz-bize" proqramında Azərbaycanda deputat seçilmək niyyətini açıqlayıb.

"Kurtlar Vadisi" serialı ilə tanınan sənətçi ölkəmizdə ona olan maraqdan danışıb:

"Azərbaycan mənim üçün önəmli bir yerdir. Oradakı maraq məni həqiqətən təəccübləndirir. Məni özlərindən biri sayırlar. Bir müddətdən sonra mən də buna öyrəşdim. Axırda qərara gəldim, gedib Azərbaycanda millət vəkili olacağam".

Akyorun yarızarafat, yarıciddi dediyi mümkündürmü?

Yenisabah.az xəbər verir ki, Azərbaycanda qanunvericliyində, ilk növbədə, Konstitusiyanın 85-ci maddəsinə əsasən:

- ikili vətəndaşlığı olan,

- başqa dövlətlər qarşısında öhdəliyi olan,

- icra və ya məhkəmə hakimiyyəti sistemlərində qulluq edən,

- elmi, pedaqoji və yaradıcılıq fəaliyyəti istisna olmaqla başqa ödənişli fəaliyyətlə məşğul olan şəxslər,

- din xadimləri,

- fəaliyyət qabiliyyətsizliyi məhkəmə tərəfindən təsdiq edilən,

- ağır cinayətlərə görə məhkum olunmuş şəxslər,

- məhkəmənin qanuni qüvvəyə minmiş hökmü ilə azadlıqdan məhrumetmə yerlərində cəza çəkən şəxslər Milli Məclisə deputat seçilə bilməzlər.

İcra və ya məhkəmə hakimiyyəti sistemlərində qulluq edənlər bir halda namizəd ola bilərlər ki, vəzifələrindən istefa versinlər.

Beləliklə, qanunvericiliyin sadalanan tələblərindən belə məlum olur ki, xarici vətəndaşlar, yaxud ikili vətəndaşlığı olan şəxslər Azərbaycan Respublikası Milli Məclisində təmsil oluna bilməzlər. Deməli, türkiyəli aktyor Oktay Kaynarca da bu sıraya daxildir.

Xatırladaq ki, 2020-ci ildə keçirilən parlament seçkilərində analoji səbəbdən 2 nəfərin namizədliyi məhdudlaşdırılıb. Bunlardan biri Gəncə şəhəri 38 saylı Nizami ikinci seçki dairəsindən deputatlığa namizədliyini irəli sürən Müzadil Həsənov, digəri isə 46 saylı Şirvan seçki dairəsindən deputatlığa namizəd olmuş Rəşad Camalovdur. Onların hər ikisinin namizədliyi ilkin məhələdə qeydə alınsa da, ikili vətəndaşlığı olmaları ucbatından seçki yarışından kənarda qalıblar.