“ABŞ prezidenti Donald Tramp Ukrayna ilə Rusiya arasında vasitəçilik etməyi bacarmadı. Ancaq Türkiyə prezidenti Rəcəb Tayyib Ərdoğan bacarıqlı adamdır, dəfələrlə ən çətin vəziyyətlərdə yüksək səviyyəli diplomatik bacarıq və qabiliyyət nümayiş etdirib. Yəni Ərdoğan Rusiya ilə Ukrayna arasında vasitəçi kimi uğur qazana bilər”.

Bunu “Reytinq” qəzetinə açıqlamasında hərbi ekspert Azad İsazadə Türkiyənin Rusiya-Ukrayna müharibəsində vasitəçi kimi iştirakının perspektivlərini şərh edərkən deyib.

A. İsazadə hesab edir ki, ABŞ lideri D. Trampın Türkiyə prezidentinə müraciəti, ona Ukrayna-Rusiya müharibəsini dayandırmaq üçün imkanlarından yararlanmağı xahiş etməsi təsadüfi deyil. Ekspertin fikrincə, bu hal Ərdoğanın məsələyə yanaşmasını daha da sürətləndirəcək. Eyni zamanda, bu o deməkdir ki, prezident Ərdoğan bu məsələdə təkcə öz adından deyil, ABŞ lideri Trampın da adından çıxış edə və onun dəstəyinə güvənə bilər.

“Vladimir Putin elan etdi ki, ayın 15-də görüşə və danışıqlara başlaya bilər. Hesab edirəm ki, Putin bu sözü havadan demir, yəni prezident Ərdoğan öncədən bundan məlumatı olub, məsələni qeyri-rəsmi müzakirə ediblər. Bundan əvvəl Ərdoğan dəfələrlə elan edib ki, Rusiya və Ukrayna arasında müharibəni dayandırmaq üçün əlindən gələni etməyə hazırdır və bunu əməli fəaliyyətində də sübuta yetirib”,- İsazadə qeyd edib.

Müsahibimiz bildirib ki, Türkiyə bu prosesdə vasitəçilik edəcək: “Yəni Türkiyənin Rusiya kimi nəhəng dövlətə, eləcə də Ukraynaya super təzyiqlər etmək imkanı yoxdur. Üstəlik, reallıq budur ki, hazırda Ukrayna və Rusiyanın mövqeyi 100 faiz bir-birinə ziddir. Bu baxımdan birinci görüşdən böyük nəticələr gözləmək də məntiqli olmazdı. Amma ən əsası prosesin başlamasıdır və sonrakı mərhələlərdə tərəflər hansısa məsələlərdə razılığa gələ bilərlər. Düşünürəm ki, Türkiyə prosesdə pozitiv rol oynayacaq”.