"Əksər partiyalar bələdiyyə seçkilərində iştirak edir. Siyasi təşkilatlar müəyyən namizədlər irəli sürüb. Hesab edirəm ki, seçkiyə qatılan siyasi partiyaların hər birinə bir neçə yer ayrıla bilər".
Bunu Qaynarinfo-ya açıqlamasında siyasi şərhçi Qulamhüseyn Əlibəyli deyib.
Politoloq bələdiyyə seçkilərinə marağın azlığının səbəblərindən də danışıb:
"Ölkədə bələdiyyə seçkilərinin keçirilməsi hiss olunmur. Həmişə belə olub və bu seçki əvvəlki seçkilərdən heç nəylə fərqlənmir. Bu onunla əlaqədardır ki, bələdiyyələrin imkanları və səlahiyyətləri, həm də maliyyə məsələləri çox zəifdir. Bələdiyyələr əslində dövlət və hakimiyyət sistemində çox zəif yer tuturlar. Ona görə də əhalinin bələdiyyə seçkilərində marağı çox azdır. Yalnız yerli vergilərin toplanması ilə məşğuldurlar, onların gördüyü işlər əhali üçün görünməzdir. Əhali hiss etmir ki, onların fəaliyyəti var, ya yox. Ona görə də başqa ölkələrindən fərqli olaraq, Azərbaycanda bələdiyyə seçkilərinə soyuq münasibət var".
Qeyd edək ki, Azərbaycanda bələdiyyə seçkiləri çərçivəsində seçkiqabağı təşviqat prosesi yanvarın 28-də rəsmi olaraq başa çatıb. Sabah isə bələdiyyə seçkiləri keçiriləcək.
