RÖVNƏQ ABDULLAYEV DÖVLƏTİN PULLARINI FUTBOL ADI ALTINDA NECƏ TALAN EDİR?
DİA.AZ: - Artıq davamlı olaraq ARDNŞ prezidenti Rövnəq Abdullayevin qara əməlləri ilə bağlı faktları işıqlandırmaqdayıq. Bu dəfə isə onun futbol biznesindəki həyata keçirdiyi maxinasiyaları araşdırdıq və ortaya çox ilginc faktlar çıxdı. Məlumat üçün bildirək ki, dünyanın əksər ölkələrində olduğu kimi artıq Azərbaycanda da futbol mafiyalaşmaq üzərədir, yəni futbol mafiyası yaradılır.
Məsələn, bu mafiyanın əsas gəlir nöqtələrindən biri oyunlara uduşların qoyulmasıdır ki, artıq bu biznes tam olaraq ARDNŞ prezidentinin nəzarətinə keçib. Rövnəq Abdullayevin yaxınları tərəfindən yaradılan «Topaz» totalizator şəbəkəsi bu gün ölkənin totalizator biznesinin yeganə fiquru olmaqla yanaşı, məhz ARDNŞ prezidentinin nüfuzu hesabına piartsayağı fəaliyyət məcburiyyətində qalan rəqibləri bir-birinin ardınca sıradan çıxarılmaqdadır. Bu işdə xüsusi fəallıq göstərəni isə artıq ARDNŞ prezidentinin sevimli alətinə çevrilmiş Vergilər Naziri Fazil Məmmədovdur. Gələn informasiyalara görə, məhz bu qurum tərəfindən «QANUNSUZ TOTALİZATOR KLUBLARI» aşkarlanaraq ifşa olunur.
İndi isə Rövnəq Abdullayevin başında dayandığı FUTBOL MAFİYASININ digər istiqamətlərdəki fəaliyyətinə nəzər salaq. Diqqətli oxucular xatırlayırsa, bir müddət əvvəl Azərbaycanın futbol üzrə milli komandasının 2010-cu il dünya çempionatının seçmə oyunları çərçivəsində son iki matçlarının nəticələrinin əvvəlcədən razılaşdırılması ehtimalları bir ara yerli mətbuatın səhifələrini bəzəmişdi. Yerli və Rusiya mətbuatında da yığma komandamızın Lixtenşteynə səfərdə qələbə qazanması (2:0), Rusiya ilə Bakıda heç-heçə (1:1) oynamasının çox şübhəli nəticələr olduğu haqda bilgilər yer almışdı. Həmin son iki oyunda komandamızın rəqiblərinin bilərəkdən zəif oynadığını isə hətta Rusiyanın ən məşhur idman şərhçiləri də qabartmaqdan çəkinmirdilər.
Iöhbət açdığımız şübhəli oyunlarla bağlı daha dəqiq və etibarlı yerdən şok məlumatlar elə bu günlərdə əlimizə keçib. Bəlli olur ki, həqiqətən mili komandamız Lixtenşteyn və Rusiya ilə oyunlarda əldə etdiyi nəticələri öz gücünə deyil, pulun hesabına qazanıb. Bizi məlumatlandıran isə adının çəkilməsini istəməyən Azərbaycanın ən məşhur futbolçularından, daha sonra məşqçilərindən biri, futbol təsərrüfatında böyük hörmət sahibi olan şəxsdir.
Əməkdaşımıza bilgi verən məşhur futbol adamı konkret faktlar da açıqlamaqdan çəkinmədi. Bildirdi ki, AFFA rəhbərliyi Lixtenşteyn üzərində qələbəyə görə hər oyunçuya 40 min manat (!) mükafat nəzərdə tutubmuş. Amma oyunçuların hərəsinə səfər qələbəsinin müqabilində cəmi 5 min manat çatıb. Hər futbolçunun mükafatından tutulan 35 min manat isə Lixtenşteynlə danışılan oyuna ötürülüb. Təbii ki, ilk baxışdan «cırtdan ölkə»nin komandası ilə oyunda 40 min manat mükafatın ayrılması inandırıcı görünməyə bilər. Bunun səbəblərinə az sonra toxunacağıq.
Əməkdaşımızı məlumatlandıran futbol mütəxəssisi qeyd etdi ki, yığmamızın Rusiya ilə Bakıdakı oyununda da AFFA rəhbərliyi şəffaf oyuna yox, bağlı qapılar arxasında aparılan çirkli söhbətə üstünlük verib. Bakıdakı oyun ruslar üçün heç bir əhəmiyyət kəsb etmədiyindən AFFA öz çirkin əməlini həyata keçirərək Rusiya ilə matçın nəticəsini də böyük pullar hesabına əvvəlcədən razılaşdıra bilib.
Məşhur futbol adamı əməkdaşımıza izah edib ki, Rusiya və Lixtenşteynlə oyunun alınması AFFA prezidenti Rövnəq Abdullayevin dövlət başçısından gizli planı olub. Azərbaycan komandası dünya çempionatının seçmə mərhələsində biabırçı şəkildə çıxış etdiyindən İlham Əliyev AFFA prezidentinin işindən narazı qalıb: «Prezident idman işini biləndir və bu sahəyə diqqət ayırır. Həm də büdcədən böyük pullar xərclənir. Rövnəq Abdullayev isə ona tapşırılan sahəni - futbolu batırıb. Üstəlik, burada ciddi maliyyə maxinasiyalarına, böyük yeyintilərə yol verir. Artıq danışılır ki, prezidentdə onun işi ilə bağlı ciddi narazılıq var».
Rövnəq Abdulayev isə son iki oyunda pulla nəticə qazanaraq dövlət başçısının yanında özünü təmizə çıxarmağa çalışıb. AFFA rəhbərinin söhbət açdığımız oyunların alınmasına konkret hansı məbləğdə para verdiyi barədə bizi məlumatlandıran futbol adamı məlumatsızdır: «Rəqəm konkret deyil. Amma görünən odur ki, söhbət milyon dollarlardan gedir».
Bayaq toxunduğumuz 40 min manat məsələsinə gəlincə isə Rövnəq Abdullayev danışılan oyunların pulunu mükafat fondundan ayrılan paralarla ödəmək üçün ağlagəlməz «premya» müəyyənləşdirib və bu pulu dövlətdən məhz bu adla alıb. Bu yolla pullar daha rahat silinir, birincidən xəbərsiz çirkli işlər həyata keçirilir.
Bizi məlumatlandıran məşhur futbol adamı yığma komandanın almaniyalı baş məşqçisi Berti Foqtsa da müqavilədə nəzərdə tutulan qədər pul verilmədiyini söylədi. Belə ki, mətbuatdan gizli saxlanılan anlaşmada əcnəbi çalışdırıcının illik məvacibi 2 milyon avro civarındadır; amma Foqtsa bunun yalnız bir hissəsi verilir, qalan paralar isə ciblərə gedir.
Bakıda milli komandamızla yoldaşlıq oyunu keçirən İspaniya yığmasının da Rövnəq Abdullayevin ayırdığı milyonlar hesabına paytaxtımıza gəldiyi barədə də çox yazılıb. Hətta İspaniyanın ən məşhur idman nəşrləri də dünya reytinqində ilk yeri tutan milli komandalarının Bakıya ancaq cəlbedici pul müqabilində yollanmalarının mümkünlüyünü qabartmışdılar. Həmin vaxt Azərbaycan və İspaniya mətbuatı ulduzlar toplusundan ibarət ispanların Bakıya 1-2 milyon avro qarşılığında gəldiyini iddia etmişdilər. Amma ötən gün bizi bilgiləndirən futbol adamı ispanların Bakıda oynamağa razılıq vermələri üçün 7 milyon dollar aldıqlarını da əminliklə söylədi.
İspanların Bakıya gəlməsinin isə maraqlı bir tarixçəsi olub. Belə ki, Rövnəq Abdullayevin oğlu İngiltərənin «Liverpul» klubunda oynayan ispan oyunçu Fernando Torresin azarkeşidir. Balaca Abdullayev atasından Torresi Bakıya gətirtməyi xahiş edib. Nəticədə ata oğlunun sözünü yerə salmayaraq 7 milyon dollar sayaraq İspaniya yığmasının tərkibində Torresi Bakıya gətizdirib. Bakıda 6:0 hesabı ilə İspaniyanın xeyrinə başa çatan oyundan sonra isə AFFA prezidentinin oğlu Torreslə söhbətləşib, şəkil çəkdirib. Bildirək ki, bu barədə o zamankı mətbuatda da müəyyən eyhamlar yer almışdı. Və bu barədə yazan qəzetlər bildirirdi ki, ARDNŞ prezidenti oğlunun bir arzusu üçün 7 milyondan vaz keçirsə, demək bu milyonlar heç də çətinliklə əldə olunmayıb. Axı, futbol mafiyası heç bir zaman və heç bir ölkədə çətinlik yaşamır. Elə bu mafiyanın əsas yuvalarından olan İtaliyada da bu belədir. Hətta İtaliyanın baş naziri Silvio Berluskoninin də sözügedən futbol mafiyası ilə əlaqələrinin olduğu faktdır.
Beləliklə, futbol təsərrüfatında onsuz da bərbad olan durum hörmətli Rövnəq müəllimin zəhməti sayəsində daha da bərbad, çirkli hala gəlmişdir. Azərbaycan futbolunu korrupsiya, yerliçilik, rüşvət başına götürüb. Cənab Abdullayev bu sahədən uzaqlaşdırılmayınca, nə futbol olacaq, nə də büdcədə pul qalacaq.
Bu arada, «Dünya» İnformasiya Agentliyi redaksiyasına (diaaz.space) daha ilginc məlumatlar da daxil olub. Məlumatlı mənbələrin bildirdiklərindən belə aydın olur ki, ARDNŞ prezidenti bu günlərdə «Qalatasaray»ın məşhur futbolçusu Arda Turanın Azərbaycan klublarından biri tərəfindən alınması təklifini yerli klublarımızın rəhbərlərinə edib: «Təbii ki, belə bir təklif yalnız arxasında ciddi maliyyənin dayandığı klublara edilə bilərdi. Təklif «Palmali» şirkətinin sponsorluğu ilə meydana çıxan «Xəzər Lənkəran» klubuna və Kəmaləddin Heydərovun oğlunun rəhbərlik etdiyi «Qəbələ» futbol klubuna edilib. Amma heç bir klub Arda Turan üçün 10 milyon avronu saymaq istəməyib. Ona görə yox ki, həmin vəsaitin ödənməsi imkanları xaricindədir. Ona görə ki, Arda Turan Azərbaycanda oynamaq istəməz. Hər halda həm Taleh Heydərov və həm də Mübariz Mənsimli Rövnəq Abdullayevdən fərqli olaraq bu gerçəkliyi yaxşı başa düşüblər».
Murad TƏHMƏZOV DİA.AZ -
