Şəkinin Şəkikənd kəndi hələ sovet dövründən özünün üzüm plantasiyları ilə məşhur olub.

Son illərdə də bu kənddə fermerler ənənəni qoruyub saxlamağa çalışıb.

Amma bu il Şəkikəndin su problemi səbəbindən məhsul əldə etmək mümkün olmayıb.

"DİA-AZ" xəbər verir ki, bu barədə Gununsesi.info-ya adıçəkilən kəndin bir qrup sakininin göndərdiyi müraciətdə deyilir.

Sakinlər bildirib ki, bu yay kəndə su kiçik fasilələrlə verilib ki, bu da məhsuldarlığa ciddi təsir edib.

Sakinlər, həmçinin mal-qaralarının da susuzluqdan əziyyət çəkdiyini deyib.

Şəkidən olan deputat Cavanşir Feyziyev isə bildirib ki, kəndlərin su problemi ilə bağlı o da bilgilidir: “Mənim millət vəkili olaraq adiyyatı qurumlarla, o cümlədən hökumətlə bu barədə müzakirələrim, təkliflərim olub. Məlumat üçün sizə deyim ki, Su Ehtiyatları Agentliyi hazırda Turan qəsəbəsi ətrafında Əyriçay Su Anbarı inşa edir. Bu anbar kəndlərin suvarma probleminin həlli üçün böyük potensiala malik olacaq. Bu proses hələ tam başa çatmasa da, ötən il anbarda yığılan sudan istifadə olundu. Görünür, bu il quraqlıq olduğundan belə bir problem yaşanıb. Ümid edirəm ki, gələn il belə problem olmayacaq. Həm Şəkikənd, həm də digər bir neçə kənddə su problemi həll ediləcək”.