2025-ci il ərzində Müdafiə Nazirliyi tərəfindən Azərbaycan Ordusunun müxtəlif hərbi hissələrinin təminatı məqsədilə ümumilikdə 40 tenderə yekun vurub.

"DİA-AZ" xəbər verir ki, bu tenderlər çərçivəsində hərbi hissələrin gündəlik fəaliyyəti üçün zəruri olan inşaat materialları, avadanlıqlar, mebel, texniki vasitələr, idman malları, təmizlik və təsərrüfat ləvazimatları, eləcə də digər təminat vasitələrinin alınması həyata keçirilib. Elan edilən tenderlərin ümumi həcmi 29 milyon 128 min manat təşkil edib.

Nazirliyin elan etdiyi tenderlərin nəticələrinə görə, 2025-ci ildə say baxımından ən çox tender qazanan şirkət “Grinco” MMC (VÖEN: 2006424781) olub. Şirkət Azərbaycan Ordusunun hərbi hissələri üçün idman malları və avadanlıqlarının satın alınması üzrə 3 tenderdə qalib gəlib və ümumilikdə 916 min manatlıq müqavilə imzalayıb.

Qeyd edək ki, “Grinco” MMC 2020-ci ildə yaradılıb, nizamnamə kapitalı 30 AZN, qanuni təmsilçisi Natıq Məmmədov Mehman oğludur. Hüquqi ünvanı Bakı şəhəri, Xətai rayonu, Rahib Məmmədov küçəsi, ev 6, mənzil 14-də yerləşir. Amma “Grinco” MMC nazirliyin ən böyük tenderlərini udan şirkət deyil.

Hərbi tenderlərin əsas oyunçuları başqa şirkətlərdir. Məsələn, “Texnolog” MMC (VÖEN: 1405435321) şirkəti nazirliyin inşaat materiallarının və əlaqədar malların alınması üzrə 2 tenderini udaraq ümumilikdə 4 milyon 526 min manatlıq müqavilə bağlayıb.

“Texnolog” MMC 2021-ci ildə yaradılıb, nizamnamə kapitalı 500 AZN, qanuni təmsilçisi Orxan Həsənov Hüseyn oğludur. Hüquqi ünvanı Abşeron rayonu, Xırdalan şəhəri, H.Əliyev prospekti, ev 9, mənzil 1, 30-cu məhəllədə yerləşir.

Daha bir hərbi hissə tenderi qalibi - “İcss” MMC (VÖEN: 1405518071) isə ildırımötürücülərin alınması ilə bağlı 2 tenderdə qalib gəlib və bunun müqabilində 3 milyon 599 min manatlıq sifarişi həyata keçirib.

“İcss” MMC 2021-ci ildə yaradılıb, nizamnamə kapitalı 10 AZN, qanuni təmsilçisi Əli Məmmədov Həbib oğludur. Hüquqi ünvanı Bakı şəhəri, Nəsimi rayonu, Şövqiyar Abdullayev, ev 23, mənzil 30-də yerləşir. Yeri gəlmişkən, “İcss” MMC indiyədək cəmi 2 tender udub, onlar da Müdafiə Nazirliyinin tenderləridir.

Digər 2 tender qaliblərindən biri “Komfy” MMC-dir. Şirkət yaylı döşəklərin alınması üzrə qalib olub və 2 milyon 279 min 273 manatlıq müqavilə imzalayıb. Yeri gəlmişkən, “Komfy” MMC indiyədək cəmi 2 tender udub, onlar da Müdafiə Nazirliyinin tenderləridir.

“Komfy” MMC 2021-ci ildə yaradılıb, nizamnamə kapitalı 100 AZN təşkil edir. Şirkətin qanuni təmsilçisi Fuad Nəcəfov Ələsgər oğludur. Hüquqi ünvanı Ağdam rayonu, Ayaq Qərvənd, ev 0, mənzil 0 ünvanında yerləşir.

“Platinium-17” MMC (VÖEN: 1101370411) isə hərbi hissələrin yeməkxanaları üçün avadanlıq və mətbəx ləvazimatlarının alınmasına dair 2 tender qazanıb və ümumi dəyəri 1 milyon 933 min 634 manatlıq müqavilə bağlayıb. Yeri gəlmişkən, “Platinium-17” MMC indiyədək cəmi 3 tender udub, onların da 1-i cəmi 21 min manatlıqdır. Yəni şirkətin əsas tenderləri – aldıcı sifarişin 99%-i Müdafiə Nazirliyinin tenderləridir.

“Platinium-17” MMC 2016-cı ildə yaradılıb, nizamnamə kapitalı 20 AZN təşkil edir. Şirkətin qanuni təmsilçisi Əvəz Abbasov Elbrus oğludur. Hüquqi ünvanı Bakı şəhəri, Qaradağ rayonu, Lökbatan ŞTQ, Seymur Orucov, ev 49, mənzil 6 ünvanında yerləşir.

Siyahıda “Halal-P” MMC (VÖEN: 1700184421) də var. Şirkət dəftərxana ləvazimatları və televizorların alınması üzrə 2 tenderin qalibi olub və 1 milyon 549 min manatlıq müqavilə imzalayıb.

“Halal-P” MMC 2004-cü ildə yaradılıb, nizamnamə kapitalı 10 000 AZN, qanuni təmsilçisi Səbinə Cəfərova Namət qızıdır. Hüquqi ünvanı Bakı şəhəri, Yasamal rayonu, Əlibəy Hüseynzadə, ev 56, mənzil 11-də yerləşir.

Eyni zamanda “Eptal Group” MMC (VÖEN: 1904368861) də 2 tenderdə qalib olub. Bu şirkət Azərbaycan Ordusunun hərbi hissələri üçün odun sobalarının və metal tərkibli mebel, kazarma inventarlarının quraşdırılması ilə birlikdə satın alınması üzrə 1 milyon 512 min 600 manat dəyərində sifariş alıb.

“Eptal Group” MMC 2020-ci ildə yaradılıb, nizamnamə kapitalı 10 AZN təşkil edir. Şirkətin qanuni təmsilçisi Bahadur Əhmədli Rövnş oğludur. Hüquqi ünvanı Bakı şəhəri, Xətai rayonu, Xəqani Rüstəmov, ev 76, mənzil 31 ünvanında yerləşir.

“Provide Solutions” MMC (VÖEN: 1405871651) də hərbi hissələr üçün mobil telefonlar və batareyaların alınması üzrə 2 tender qazanıb və ümumilikdə 332 min 953 manatlıq tenderlərdə qalib sçilib.

Qeyd edək ki, “Provide Solutions” MMC 2022-ci ildə yaradılıb, nizamnamə kapitalı 10 AZN təşkil edir. Şirkətin qanuni təmsilçisi Fərid Məmmədov Samir oğludur. Hüquqi ünvanı Bakı şəhəri, Nəsimi rayonu, Feyzulla Qasımzadə, ev 9, mənzil 96 ünvanında yerləşir.