Sovet dönəmində olduğu kimi müstəqillik illərində də rayon rəhbərləri bölgələr üçün "balaca padşahlar”a çevrilib. "Birinci katib” stasusu yalnız ad olaraq dəyişib, forma və məzmunca isə sadə vətəndaş üçün situasiya daha da ağırlaşıb. Eyni zamanda yeni dönəmin "balaca padşahları” öz fəaliyyətləri, müxtəlif olaylar və xobbiləri ilə daha çox təəccübləndirir.
Həyat yolu: musiqi məktəbindən gömrüyə, ordansa…
Süleyman Surxay oğlu Mikayılov 1962-ci ildə aprelin 27-də anadan olub. 1979-cu ildə Naxçıvan şəhər 2 saylı orta məktəbini, 1984-cü ildə Azərbaycan Dövlət Bədən Tərbiyəsi İnstitutunu, 2004-cü ildə isə Bakı Dövlət Universitetinin Hüquq fakültəsini bitirmişdir.
1979-cu ildə Naxçıvan şəhər Uşaq idman məktəbində məşqçi kimi əmək fəaliyyətinə başlayıb. 1984-1994-cü illərdə Naxçıvan şəhər orta ixtisas musiqi məktəbində bədən tərbiyəsi rəhbəri, 1994-1995-ci illərdə «Səma» kiçik müəssisəsinin direktoru işləyib. 1995-1999-cu illərdə Bakı Baş Gömrük İdarəsinin Qaçaqmalçılıq və Gömrük Qaydalarının Pozulmasına Qarşı Mübarizə şöbəsinin rəisi, idarə rəisinin birinci müavini, idərənin rəisi vəzifələrində çalışıb. 1999-2001-ci ildə Dövlət Gömrük Komitəsinin İşlər İdarəsi rəisinin müavini, bir müddət Vergilər Nazirliyinin Operativ Nəzarət İdarəsinin rəisi işləyib.
2005-ci ildə Yardımlı Rayon İcra Hakimiyyətinin başçısı, 2005-2010-cu illərdə isə Lənkəran Şəhər İcra Hakimiyyətinin başçısı vəzifələrində çalşıb. Azərbaycan Respublikası Prezidentinin 4 mart 2010-cu il tarixli Sərəncamı ilə Bakı şəhəri Qaradağ Rayon İcra Hakimiyyətinin başçısı təyin edilib. 2003-cü ildən Azərbaycan Respublikası Boks Federasiyasının vitse prezidentidir.
İdmançı icra başçısı necə hüquqşünasa çevrildi?
Qaradağ rayon icra hakimiyyətinin başçısının həyat yolu ilə bağlı redaksiyamıza daxil olan informasiyalar kifayət qədər ilgincdir. İcra başçısının 1984-cü ildə Bədən Tərbiyəsi Akademiyasını bitirməsi bir sıra müəmmalara yol açır. Belə ki, yayılan məlumatlara görə, Süleyman Mikayılov bir neçə dəfə Akademiyadan kənarlaşdırılıb. Onun dərslərə dəvamiyyətində və bir neçə dəfə dava etdiyinə görə ali məktəbdən qovulduğu bildirilir. Nəhayət 22 yaşında S.Mikayılov ali məktəbi bitirə bilib. Boksla məşğul olmasına baxmayaraq heç bir əmək fəaliyyəti olmayıb. Bundan sonra isə S.Mikayılov biznes fəaliyyəti ilə məşğul olub. Yalnız regional amillər baxımından o Yardımlı rayonunda icra başçısı təyin edilib. Maddi imkanlarını bir qədər də genişləndirdikdən sonra S.Mikayılov 2004-cü ildə Bakı Dövlət Universitetinin hüquq fakültəsini bitirib. Hər halda əlimizdə olan rəsmi tərcümeyi-halda belə yazılır. Apardığımız araşdırmalar zamanı bəlli olub ki, əslində bu icra başçısı Dərdənddə adı bəlli olmayan bir ali məktəbə pulla daxil olub. 2001-ci ildə həmin ali məktəbdə bir il adı tələbə kimi qeyd edilən S.Mikayılov icra başçısı olduğu dönəmdə «perevod» alaraq BDU-nun hüquq fakultəsinin tələbəsinə çevrilib. 42 yaşında BDU-nun məzunu olan icra başçısı tərcümeyi-halına hətta bir zamanlar elmlər namizədi adı da yazdırmaq istəyib. Laki onun bu arzusu hələ də gerçəkləşməyib. Bu mövzu ilə bağlı olaraq da araşdırmalarımız davam edir.
Hər kəs ondan üz çevirdi
Uzun illər Boks Federasiyasının vitse-prezidenti olan S.Mikayılov hər yerdə bu federasiyanın prezidenti olan fövqəladə hallar naziri Kəmaləddin Heydərovun adından sui-istifadə edib. Bu federasiyada bütün icra işlərini həyata keçirən icra başçısı ilə bağlı çox əhəmiyyətli problem ötən il ortaya çıxıb. Məlum olub ki, Boks üzrə Azərbaycan yığmasının tərkibinin formalaşmasında ciddi yanlışlıqlara yol verilib. S.Mikayılov daha təcrübəli, lakin heç bir himayədarı olmayan boksçuları yığmaya daxil etməyib. Bu məsələ Kəmaləddin Heydərova şikayət edən boksçulardan birinin müraciətinin araşdırılması zamanı agah olub. Bundan sonra isə icra başçısı ilə bağlı olaraq problem yaranıb. Bir neçə dəfə tanınmış dövlət məmurlarının adından istifadə edən icra başçısı hətta YAP funksioneri, millət vəkili Siyavuş Novruzovdan siyasi dəstək istəyib. Hətta onun Nərimanov rayon icra hakimiyyətinin başçısı Abidin Fərzəliyevdən də dəstək istədiyi söylənilir. Məlumatlara əsasən hakimiyyətin yuxarı dairələrində ciddi nifuz problemi yaşayan Qaradağın icra başçısı hələ ki, Nərimanovun icra başçısı himayə etməyə çalışır. Lakin redaksiyamıza daxil olan kifayət qədər ilginc informasiyaya əsasən Səbayel rayon icra hakimiyyəti ilə ciddi problemləri olması üzündən S.Mikayılov ən qısa zamanda işi ilə vidalaşmaq zorunda qala bilər. S.Mikayılovun belə çətin durumu onun idarəetmə sistemindəki problemlərlə bağlıdır. İcra başçısının Qaradağdakı əməlləri haqda redaksiyamıza daxil olan ilginc məlumatları diqqətinizə çatdırırıq.
Lökbatanda 5 obyekt
Süleyman Mikayılovun rayona rəhbərlik etdiyi müddətdə Lökbatan qəsəbəsi sosai cəhətdən iflic vəziyyətə düşüb. Qəsəbədaxili və qəsəbəarası yollar dağıdılıb, uzun müddət təmir olunmadığı üçün gediş-gəliş çətinləşib. Rayonu mərkəzini qəsəbələrlə birləşdirən yollar tam yararsız vəziyyətdədir. Süleyman Mikayılov yalnız iş adamlarına məxsus obyektləri sökərək onların yerində özünə obyekt tikdirir. Təkcə Lökbatan qəsəbəsində belə üsulla 5 obyekt tikilib. O hətta özü üçün tikdirdiyi obyektin açılışını dövlət səviyyəsində edib. İcra başçısı Lökbatan qəsəbəsindəki bazarı qanunsuz olaraq özəlləşdirməklə 4 milyon 800 min manat mənimsəyib. Lökbatan qəsəbəsi, 28 May küçəsində yerləşən kolxoz bazarı Mikayılovun göstərişi ilə ələ keçirilib.
Kadr uğursuzluğu: Qobustanda 2 ilə 4 rəhbər
Qaradağ rayonunun digər böyük qəsəbəsi olan Qobustan qəsəbəsində iki ildə dörd dəfə qəsəbə icra hakimiyyəti nümayəndəsinin dəyişdirilməsi kadrların düzgün seçilib yerləşdirilməməsinin nəticəsidir. Onlardan biri, Lənkəranda S.Mikayılovun müavini işləmiş Nadir adlı şəxs Qobustan qəsəbəsinə icra hakimiyyətinin nümayəndəsi təyin olunandan qısa müddət sonra spirtli içkinin təsiri nəticəsində qəza törədib. Uzun müddət müalicədən sonra indi də onu təşkilat şöbəsinə müdir qoyub ki, tikinti-abadlıq işləri üzrə müavin vəzifəsinə təyin etsin. Hazırda Prezident Administrasiyasına onun təyinatı barədə təqdimat verilib. Rayonun əksər qəsəbələrinin icra nümayəndələri yerli kadr deyil, gəlmələri isə yalnız pul maraqlandırır.
"Cırtdan kafesi”
S.Mikayılov 2 il öncə Hərbi Hava Hücumundan Müdafiə qərərgahının sığınacağını bərbad vəziyyətə salmış və onun yanında özünə ictimai iaşə obyekti tikmişdi. Bundan başqa Lökbətan qəsəbəsi 28 may küçəsindəki uşaq parkında icra başçısına məxsus olduğu deyilən "Cırtdan kafesi” tikdirib. Yerli əhalinin sözlərinə görə bu kafedə pullu oyunlar oynanılır ki bu da sakinlərin narazılığına səbəb olur.
Talanan büdcə vəsaitləri
Hazırda isə Qaradağ rayonunda büdcə vəsaiti talan edilir, abadlıq adı altında iş adamlarından vəsait toplanır. Rayonda son dövrdə 50 mindən yuxarı qanunsuz tikili var. Bunlardan yığılmış vəsaitin miqdarı 200 milyondan yuxarıdır. Prezident bu rayondakı tədbirlərdə iştirak etdiyi onun getdiyi yerlərin ətrafı qismən abadlaşdırılır, ondan 30 metr aralı isə bərbad vəziyyətdədir. Bunu bütün qəsəbələrdə müşahidə etmək mümkündür. Qismən aparılan abadlıq işləri ara fəhlələri tərəfindən icra olunur, bunlar da günəmuzd işləyirlər. Büdcədən ayrılan vəsait isə hara getdiyi məlum deyil. İndi rayonun büdcəsi milyonlarla ölçülür. Bu pulun hara xərclənməsi isə sakinlərə məlum deyil.
İcra başçısının pulyığanları
Qaradağ rayon icra hakimiyyətinin başçısı Süleyman Mikayılov karxanalar üzərində öz payı olan ciddi fiqurdur. Onun adından bu işləri Qaradağ rayon Mənzil Kommunal Təsərrüfat Birliyinin rəisi Rasim Əhmədov həyata keçirir. Xəbərə görə, Rasim Əhmədov bir ay ərzində karxanalardan icra başçısının adı altında təxminən 120-150 min manata yaxın pul yığır. Onu da bildirək ki, ümumiyyətlə, Süleyman Mikayılovun müxtəlif sahələr üzərə peşəkarlaşmış pulyığanları var. Məlumatlı mənbənin diaaz.space-a bildirdiyinə görə, əgər karxanalardan haqqı Rasim Əhmədov yığırsa, torpaq alverinə də rayonun baş memarı Naiq Səmədov baxır. Məhz onun əli ilə «Çakır» ləqəbli Süleyman Mikayılov rayon ərazisində inşa olunan fərdi evlərin hər birinin ilk mərtəbəsindən müvafiq olaraq 3000 manat, ikinci mərtəbəsinə görə isə 5000 manat pul alır.
Bir sözlə, Qaradağ rayonunda illərdir özünə fironsayağı xanədan qurmağa müvəffəq olan Süleyman Mikayılovun yeganə qazanc yeri heç də karxanalar deyil. Amma buna baxmayaraq, demək olar ki, nəzarətsiz buraxılmış daş karxanaları həm işçiləri üçün ölüm mənbəyi hesab olunur, həm də daş alıcıları üçün bir tələdir. Məsələn, artıq dünəndən etibarən Süleyman Mikayılovun göstərişi ilə dünənə qədər ədədi 30-35 qəpiyə satılan daşlar 40-45 qəpiyə qədər bahalaşdırılıb.
DİA.AZ bildirir ki, Süleyman Mikayılovun keçən əsrin 90-cı illərindəki fəaliyyəti ilə bağlı geniş materialı da yaxın vaxtlarda təqdim edəcəyik. Bizi iləməkəd davam edin. Qarşı tərəfi də dinləməyə hazırıq...
