“85 yaşım tamam oldu. Bütün arzularım həyata keçib. Bir arzum da var ki, bütün türk dövlətləri birləşib, mehriban olsunlar. Dövlətimizin şükür Allaha nüfuzu var. Zəngəzur dəhlizinin açılmasını istəyirik. Bundan gözəl nə ola bilər? Bu vətənin, elin, torpağın övladıyamsa mən xalqımıza yalnız əmin-amanlıq arzulaya bilərəm”

Bunu Moderator.az -a açıqlamasında xalq artisti Niyaməddin Musayev deyib. O daha sonra əlavə edib:

“Allah nə qədər ömür veribsə onu da yaşayacam. Bizim deməyimizlə deyil ki. İdman etməklə də ömür uzanmır.. Nə qədər yaşayaramsa yaşayaram. Bunu Allah bilir” deyə sənətkar bildirib.

Niyaməddin Musayev son illərdə konsert proqramı ilə çıxış etməməsinə də aydınlıq gətirib:

“Bu təşkilatçılardan asılıdır. Mən kimə gedib deyim ki, konsertimi edin? Niyə etmirsiz? Onlar özü guya görmür? Mədəniyyət Nazirliyi də görməlidir, bu sahəyə baxan insanlar bununla məşğul olmalıdırlar. Uşaqdan-böyüyə hər kəs mahnılarımı sevir. Mənim konsertim əladan da əla keçər. Canlı da oxuyuram, səhnə görkəmim də yerindədir. Başları qarışıqdır yəqin ki.. Nə vaxtsa ayılarlar. Mən yenə də dövlətimizdən çox razıyam” deyə sənətkar bildirib.