"Artıq Vaşinqton görüşü keçirildikdən və sülh müqaviləsi paraflandıqdan sonra Azərbaycan, Rusiya, Ermənistan arasında imzalanan üçtərəfli bəyanat qüvvədən düşmüş sayılır. Çünki həmin bəyanat müharibənin dayandırılmasına yönəlmişdi".
Bu fikirləri Redaktor.az-a politoloq Zeynal Əmrəliyev Ermənistan Baş naziri Nikol Paşinyanın Ermənistan, Rusiya və Azərbaycan liderlərinin 9 noyabr 2020-ci ildə imzaladığı üçtərəfli bəyanat artıq qüvvədən düşməsi ilə bağlı verdiyi açıqlamadan danışarkən bildirdi.
"Artıq müharibə dayandırılıb, iki ölkə arasındakı əsas məsələlərin böyük hissəsi danışıqlar yolu ilə həll olunub və sülh müqaviləsinin imzalanması üçün yalnız texniki məsələlər qalıb. Sülh müqaviləsi paraflanıb və Azərbaycanla Ermənistan arasında razılaşdırılmamış bir çox məqam da artıq öz həllini tapıb. İki ölkə arasında müharibə bitib, eyni zamanda sülh şəraiti də formalaşıb. Bu müddət ərzində Azərbaycan və Ermənistan arasında ciddi gərginlik müşahidə olunmayıb".
Onun sözlərinə görə, regionda geosiyasi reallıqlar da dəyişib:
"Həm rəsmi İrəvanın, həm də rəsmi Bakının Rusiya ilə münasibətlərində üçtərəfli bəyanatın imzalandığı dövrlə müqayisədə fərqli situasiya yaranıb. Cənubi Qafqaz yeni geosiyasi reallıqlar şəraitindədir və belə olan halda üçtərəfli bəyanatın qüvvədə qalmasına, yaxud onun şərtlərinə uyğun hərəkət edilməsinə ehtiyac yoxdur. Bundan sonra müxtəlif səviyyəli görüşlər keçirilib və artıq ABŞ-nin vasitəçiliyi ilə Ermənistan-Azərbaycan arasında imzalanmış yeni bir razılaşma mövcuddur. Bu razılaşmanın hüquqi çəkisi daha böyükdür və sülh yolunda daha faydalı olacaq.
Sözügedən sənəd sülh müqaviləsinin ilkin variantıdır. Yəni paraflanıb və onun əsasında yekun sülh müqaviləsi imzalanacaq. Sülh müqaviləsi imzalandıqdan sonra üçtərəfli bəyanata ehtiyac qalmayacaq. Çünki həmin bəyanat sadəcə olaraq müharibənin aktiv fazasını dayandırmaq üçün nəzərdə tutulmuşdu. Müharibə isə artıq uzun müddətdir ki, başa çatıb və qarşıdakı proses birbaşa sülh müqaviləsinin imzalanmasına yönəlib. Bu baxımdan üçtərəfli bəyanat gündəmdən çıxır".
