Bir müddət əvvəl Nərimanov rayonu İsmayıl Hidayətzadə küçəsində ağacların dibinin asfaltlanması məsələsi gündəmə gətirilmişdi. Küçədə yeni kompleks tikildiyi üçün kompleksin qarşısında olan ərazidə ağacların dibi asfaltlanmışdı. Azərbaycan Avtomobil Yolları Dövlət Agentliyi məsələdən xəbərdar olmadığını açıqlasa da, bildirmişdi ki, bu prosesi həyata keçirən yol idarəsi cəzalandırılacaq. Kimsə cəzalandırılsa da, reallığı dəyişmək mümkün deyil.

Xatırladaq ki, 2025–2030-cu illər üçün Dövlət Proqramı çərçivəsində Bakı Şəhər İcra hakimiyyətinə Bakı şəhərində piyadaların maneəsiz hərəkətinin təmin edilməsi məqsədilə küçə və prospektlər üzrə səkilərin mövcud vəziyyətinin araşdırılması, mövcud səki hissələrinin zəbt edilməsi hallarının qarşısının alınması üçün zəruri tədbirlər görülməsi tapşırılıb.

Nəqliyyat məsələləri üzrə ekspert Rauf Ağamirzəyev İsmayıl Hidayətzadə küçəsində səkilərin zəbt olunması ilə bağlı Bizimyol.info xəbər portalına açıqlamasında bildirib ki, sistemli (strukturlaşdırılmış) urbanistik və idarəetmə problemlərini aşağıdakı şəkildə qeyd etmək olar: “Səkilər piyadalar üçündür, lakin qanunsuz olaraq avtomobillər üçün dayanacaq (parkinq) məkanına çevrilir. Səkinin funksiyası dəyişsə də, buna nə qanuni əsas, nə də müvafiq icazə göstərilir”.

Rauf Ağamirzəyev qeyd edib ki, şəhər planlaşdırmasında piyadaların nəzərə alınmaması da diqqət çəkir: “Yeni tikililər layihələndirilərkən piyadaların hərəkəti və təhlükəsizliyi nəzərə alınmır. Tikinti obyektlərinin qarşısında piyadalara yer buraxılmadan avtomobillər üçün sahə yaradılır”.

Nəqliyyat məsələləri üzrə ekspert vurğulayıb ki, obyektlərin qarşısında olan səkilər obyektin "əmlakına" çevrilir. Bu sahələr ya parkinq, ya da masa yerləşdirilən kommersiya zonaları kimi istismar edilir. Bu da ictimai məkana müdaxilə və şəhərin özəlləşdirilməsi deməkdir. Əksər hallarda şikayət olmadan vəziyyət illərlə davam edir. Cərimə və ya bərpa mexanizmləri ya yoxdur, ya da tətbiq olunmur. Vətəndaşların şikayətləri çox zaman nəticəsiz qalır”.

Rauf Ağamirzəyev vurğulayıb ki, aidiyyəti qurumlar arasında koordinasiya olmaması da əsas problemlərdən biri kimi nəzərə alına bilər. Ekspertin fikrincə, bu kimi vəziyyətlər təkcə bir küçəyə aid deyil, Bakının bir çox ərazisində müşahidə edilən sistemli şəhərsalma böhranın simptomudur.