“Ermənistanın Baş naziri Nikol Paşinyanın yürütdüyü xətt dünyada gedən proseslərə uyğundur”.

Bu sözləri Azad Vətən Partiyasının sədri Akif Nağı “Cebheinfo.az”-a açıqlamasında deyib.

O bildirib ki, Paşinyan ölkəsində Rusiyanın təsir imkanlarını məhdudlaşdırmağa çalışır:

“O, həm də Azərbaycan və Türkiyə ilə münasibətlərin normallaşması, Avropa İttifaqı və Qərblə yenidən əlaqələrin qurulması üçün səy göstərir. Bütün bunların hamısı müsbət tendensiyanın göstəriciləridir. Paşinyan daxildə bu prosesə qarşı çıxan müəyyən müqavimət mərkəzilərini sındırmağa çalışır. Artıq xaricdən idarə olunan Serj Sarkisyan və Robert Köçəryandan ibarət müxalif bloku kifayət qədər zəiflədə bilib. İctimai rəydə də artıq onlara rəy yoxdur”.

Siyasətçi qeyd edib ki, proseslərə əngəl törədən əsas qüvvələrdən biri də kilsədir:

“Bu səbəbdən Paşinyan kilsənin də müqavimətini sındırmalıdır. Proses də ona doğru gedir. Artıq kilsənin də erməni cəmiyyətindəki nüfuzu həddindən artıq aşağı düşüb. Onlar sadəcə hay-küy salaraq aksiya keçirir və xaricdəki ermənilərin diqqətini çəkməyə çalışırlar.

Buna rəğmən, heç nəyə nail ola bilmir və Rusiyanın diqqətini çəkmirlər. Kreml Samvel Karapetyanı həm özünün, həm də kilsənin nümayəndəsi kimi göndərmişdi. Vəziyyətin dəyişəcəyini düşünürdürlər, amma Paşinyan orada da üstünlük əldə etdi və Karapetyanı həbs etdirdi. Hesab edirəm ki, Moskva Paşinyanın Karapetyana qarşı hərəkətlərindən sonra kilsəyə qarşı addımları ilə də razılşacaq”.

Onun sözlərinə görə, Paşinyan kilsəni nəzarəti altına almaq istəyir:

“Görünən odur ki, kilsənin nə daxildə, nə də xaricdə ciddi dəstəyi var. Üstəlik, hakimiyyətə müqavimət gücü həddindən artıq zəifləyib. Düşünürəm ki, Nikol Paşinyan bir anın içərisində kilsə ilə bağlı planlarını həyata keçirəcək. O, kilsəni təmizləmək xəttini tutub. Bəlkə də bir müddət sonra kilsənin korrupsiya və rüşvət yuvası olduğuna dair məlumatlar ortaya çıxacaq. Nəticədə isə Paşinyan kilsənin rəhbərliyinə öz xəttinə uyğun olan şəxsi gətirəcək”.

Akif Nağının fikrincə, bütün ermənilərin katalikosu II Qaregin həbs oluna bilər:

“Əgər konkret cinayət işləri varsa, II Qaregin də həbs oluna bilər. Əgər digər din xadimləri və keşişlər həbs olunubsa, onun da tutulması mümkündür. Ümumiyyətlə, II Qareginin müqavimət gücü sadəcə kilsədir. Kilsənin rəhbərləri isə həbs olunmasına rəğmən Ermənistanda ciddi etirazlar yoxdur.

Kilsənin ölkənin daxilində sosial bazasının olmadığı açıq şəkildə görünür. Xaricdən isə kilsəni sadəcə Rusiya dəstəkləyirdi. Ancaq onun da dəstəyi artıq effekt vermir. Bütün bunlara görə daxildən və xarincdən dəstəyi olmayan II Qareginin vəzifəsindən uzaqlaşdırılması asan olacaq.

Prosesin sonunda onun həbs olunma ehtimalı da realdır. Çünki II Qaregin vəzifəsindən çıxarılandan sonra istər-istəməz Paşinyana qarşı olan qüvvələrin mərkəzinə çevrilə bilər. Onları neytrallaşdırmaq üçün II Qareginin həbs olunma ehtimalı yüksək dəyərləndirilir”.