Hüquq-mühafizə orqanlarında, müxtəlif nazirliklərdə çalışan rəhbər şəxslərin oliqarxa çevrilməsi günümüzün reallığıdır. Ancaq məktəb direktorunun oliqarxa çevrilməsi, böyük biznes sahibi olması artıq çox şey deməkdir… Qafqaznews.az-ın redaksiyasına Xəzər rayonundakı sağlamlıq imkanları məhdud uşaqlar üçün 6 saylı xüsusi internat məktəbin direktoru Balamirzə Zeynalov barədə ilginc məlumatlar daxil olub.
Uzun illərdir məktəb direktoru vəzifəsində çalışan Balamirzə Zeynalov Türkan qəsəbəsində Türkan Sahil-Qızıl Qum adlı restoranın sahibidir. Məktəb direktoru dəyəri 80 min manat olan CİP sürür, özü də 100 nömrə ilə… İstər-istəməz sual yaranır ki, hər ay konkret əmək haqqına qol çəkən məktəb direktoru 80 minlik avtomobili hansı pulla alıb..?
Yaxud məktəb direktoru hara, restoran sahibi olmaq hara? Həm də nəzərə almaq lazımdır ki, 6 saylı məktəb sağlamlıq imkanları məhdud, yəni xəstə uşaqlar üçün nəzərdə tutulub. Belə çıxır ki, dövlətin xəstə uşaqlar üçün ayırdığı vəsaiti məktəb direktoru həzm-rabedən keçirərək özü üçün mal-mülk alır.
Türkan qəsəbəsinə ezam olunan əməkdaşımızın Balamirzə Zeynalovun obyektindən hazırladığı reportajdan bəlli olur ki, Balamirzə Zeynalov restorandan savayı dənizi də hasarlıya bilib. Yəni bir sözlə türkanlılar Balamirzə Zeynalovun hasarladığı dənizə pulla-ödənişlə istirahət etməyə gedirlər. Görəsən, belə təmtəraqlı həyat tərzi sürən məktəb direktoru fiziki qüsurlu uşaqların dərdinə necə şərik ola bilər..? Araşdırmamız davam edir. Bizi izləyin.
