Mən hələ də tam olaraq anlmıram: ABŞ və Avropa Ukrayna məsələsində niyə eyni mövqedən çıxış etmir?!
ABŞ prezidenti Donald Tramp Rusiya diktatoru Vladimir Putindən hələ neçə dəfə məyus olmalıdır ki, Qərb Ukrayna məsələsində birləşsin. Rusiya ABŞ-ı Avropa İttifaqı və Böyük Britaniya ilə birlikdə "kollektiv Qərb" adlandırsa da, ortada real bir kollektiv hələ ki görünmür. 26 Qərb dövlətinin Ukrayna üçün keçirdiyi axırıncı toplantıda ABŞ prezidentin Yaxın Şərq üzrə nümayəndəsi Stiv Uitkoff ilə təmsil olunurdu.
Rusiyanın xarici işlər naziri Sergey Lavrov deyir ki, Qərb Rusiyanı parçalamaq istəyir.
Əlbəttə, Lavrovun dediyi istisna deyil, hətta gerçəkdir ki, Qərb Rusiyanı parçalamaq istəyir. Hələ Zbiqnev Bjeniskidən üzübəru bu plan üzərində kimlər, kimlər çalışıblar. Rusiyanın parçalanması yeni ideya deyil. Ancaq bu, indiki mərhələnin prioriteti deyil.
İndiki mərhələdə Qərb Rusyadan da əvvəl Ukraynanı bölüşdürməyin yolunu axtarır. Bunu daha əvvəl geniş yazmışıq. Bəli, ABŞ Ukraynada daha böyük paya sahib olmaq üçün bir tərəfdən Rusiya ilə, bir tərəfdən də Avropa İttifaqı və Böyük Britaniya ilə siyasi-diplomatik mübarizə aparır. Nəticədə hazırda Ukraynadakı real güc öz ordusu ilə çətinliklə də olsa, irəliləyən Rusiyadır, ABŞ və Avropa deyil.
Vladimir Putin deyir ki, Ukraynada yerləşdiriləcək xarici qoşunlar Rusiya Silahlı Qüvvələrinin legitim hədəfi olacaq. Yəni qıraqdan kim gəlsə, Rusiya onu vuracaq. Kreml anlayır ki, Ukrayna ərazisinə xarici dövlətlərin qoşunlarının gəlməsi Ukraynaya təhlükəsizlik təminatları deməkdir. Bu da Rusiyanın Qərblə açıq toqquşmasına gətirib çıxaracaq. Rusiya əleyhinə bugünkü beynəlxalq siyasi ittifaq beynəlxalq hərbi koalisiyaya çevrilə bilər. Ukraynada onsuz da zəifləmiş Rusiya belə bir perspektivə hazır deyil. Ona görə də son vaxtlar Rusiya müharibədə taktikanı dəyişir; hətta Ukraynaya hərbi deyil, humanitar yardım göstərən Azərbaycanın da oradakı varlığı Moskvanı qıcıqlandırıb. Bundan başqa Rusiya artıq xarici ölkələrin və beynəlxalq təşkilatların Kiyevdəki ofislərini, həmçinin Ukraynanın dövlət binalarını hədəf seçib.
ABŞ və Avropa arasındakı ziddiyyətlər Rusiyanı Ukraynada daha aqressiv olmağa həvəsləndirir. Eyni zamanda Çindən və Hindistandan siyasi, Şimali Koreyadan əsgəri dəstək alan Putin Qərbə aşkar meydan oxuma modundadır. Belə bir reallığın yaranmasının səbəbkarı Rusiyanın "kollektiv Qərb" adlandırdığı ABŞ və Avropanın ortaya gerçək bir kollektiv iradə qoya bilməməsidir.
