Azərbaycan Prezidenti İlham Əliyev və birinci xanım Mehriban Əliyevanın Çinə səfər çərçivəsində Ermənistanın Baş naziri Nikol Paşinyan və xanımı Anna Akopyanla ayaqüstü görüşləri maraqla qarşılandı. Bu, regionda sülhə doğru mühüm jest kimi qiymətləndirilir.

Azərbaycan Prezidenti həmçinin Çin rəhbərliyinə Bakı ilə İrəvan arasında sülh şəraitinin mövcud olduğunu və bu istiqamətdə irəliləyişlərin əldə edildiyini bildirib. Vaşinqtonda keçirilən görüşdən sonra Çində baş tutan bu qeyri-rəsmi təmaslar tərəflər arasında münasibətlərin istiləşdiyini göstərir.

Globalinfo.az-a danışan politoloq Natiq Miri deyib ki, Azərbaycan Prezidenti həm Vaşinqton səfəri zamanı, həm də sonrakı müddətdə dəfələrlə Ermənistanla sülh şəraitinin mövcud olduğunu vurğulayıb:

“Bu, dolayısı ilə müharibənin başa çatdığına işarədir. Çində Azərbaycan və Ermənistan dövlət başçılarının, o cümlədən, xanımlarının ayaqüstü görüşü də bunun praktik sübutudur. Belə bir görüş təsadüfi deyil. Prezident söylədiyini əməli şəkildə də nümayiş etdirir. Artıq münasibətlərin istiləşdiyi mesajı verilir. Bu, həm Vaşinqtona, həm də prosesdə maraqlı olan geosiyasi güc mərkəzlərinə, eləcə də bütün dünyaya ünvanlanmış mesajdır. Belə görüntülərin olması hər iki ölkənin ictimai rəyinə müəyyən qədər təsir edir”.

Politoloq əlavə edib ki, yekun sülh müqaviləsinin imzalanmasından danışmaq hələ tezdir:

“Çünki konkret şərtlər var və onların yerinə yetirilməsi asan görünmür. Sülh müqaviləsinin imzalanması, böyük ehtimalla, 2026-cı ildə Ermənistanda keçiriləcək parlament seçkilərinin nəticələrindən asılı olacaq. Əgər Nikol Paşinyan və komandası seçkilərdə uduzar, radikal və revanşist qüvvələr Rusiyanın dəstəyi ilə hakimiyyətə gələrsə, sülh müqaviləsinin taleyi sual altına düşə bilər”.

Natiq Mirinin fikrincə, bunun qarşısını almaq üçün Paşinyan parlament seçkilərinə sülh vədini reallaşdırmaq məqsədi ilə getməlidir:

“Əks halda, bu, onun üçün məğlubiyyət olacaq. 2021-ci il seçkilərində xalq məğlub Paşinyana mandatı ona görə verdi ki, o, seçkidə əsas tezis olaraq Ermənistana sülh gətirəcəyini vəd etmişdi. Çindəki bu görüntü olduqca vacibdir. Yalnız sonrakı müddətdə sülh müqaviləsinin imzalanacağı məkan barədə də danışmaq olar. O baxımdan, prosesə töhfə verən və “müharibə başa çatdı” anlayışını formalaşdıran ABŞ rəhbərliyinin vasitəçiliyi ilə Vaşinqtonun məkan olaraq seçilməsi mümkündür”.