"Mən Nihatın atasıyam. Hadisə iyunun 25-də Baş Mil kanalının Füzuli rayonunun Kərimbəyli kəndi ərazisindən keçən hissəsində baş verib. Axtarışlara baxmayaraq bu günə qədər hələ də uşaqdan xəbər yoxdur".

Bu sözləri Bizim.Media-ya açıqlamasında 44 günlük Vətən müharibəsi iştirakçısı, oğlu 13 gündür kanalda boğulan Nihat Nağızadənin atası Vüqar Nağıyev deyib.

Oğlu 16 yaşlı Nihat Nağızadə 13 gün əvvəl Baş Mil su kanalında boğulub. FHN əməkdaşları ilə birgə kənd sakinləri də axtarış işlərinə könüllü qatılıb. Lakin suyun Böyük Bəhmənli kəndi ərazisində 220 metr uzunluğunda tuneldən keçməsi hər kəsi çarəsiz qoyub. Vüqar Nağıyev deyir ki, oğlunun nəşinin tapılması üçün tək çarə kanalın qurudulmasıdır:

"Yəni bizim bir nəticə əldə edə bilməməyimizin səbəbi məhz bu suyun sürətli axını və dərin olmasıdır. Füzulidə 3 yeraltı tunel var ki, məhz onlardan da birincisi bu tuneldir. Meyidin burada ilişib qalmasına şübhə uşağın ayaqqabısının bir taynın bu tuneldən çıxmasıdır. Ayın 7-dən bu günə qədər 24 saat fasiləsiz bura nəzarət edilir ki, bəlkə iz tapıla...”

44 günlük Vətən müharibəsində ön xəttə tibb personalı kimi iştirak etmiş Vüqar Nağıyev fəryad edərək aidiyyəti qurumlardan oğlunun tapılması istiqamətində zəruri tədbirlərin görülməsi üçün kömək istəyib:

"İstəyimiz aidiyyəti qurumlardan bu suyun dayandırılmasıdır. Biz "112" xidmətinə təkrar-təkrar müraciət etdik. Onların xüsusi qruplu dalğıcları suyu bu hissədən pompalayıb çıxaracaq matorları ilə gəliblər, lakin bu gün qarşımızda dayanan ən böyük problem bu tuneldən suyun çəkilməməsidir. Bu su birmənalı olaraq qurudulmalıdır. Suyun da qurudulmamasına səbəb kimi bu kanalın bir neçə rayona ötürülməsi göstərilir. Burda insan faktorundan söhbət gedir, yəni biz aylarla suyun qurudulmasını istəmirik. İstəyirik ki, sadəcə bir və ya maksimum iki sutka qurudulsun. Dalğıclar o tunelə girə bilsin, çünki orada təzyiq 40 kubmetrə çatır. Suyun dərinliyi 3 metrdən artıqdı, o təzyiqlə ora dalğıc girə bilmir. Bir sözlə aidiyyəti qurumlardan kömək istəyirik".

Qeyd edək ki, sözügedən ərazidə - tunelin çıxış hissəsində sadəcə vizual axtarışlar davam edir.

Sakinlərin ehtimalına görə, meyid tunelin içərisində olan armatur çıxıntılara ilişə bilər.