İyunun 14-də ölkəmizin ümumtəhsil məktəblərində keçirilən “Son zəng” tədbirləri maraqlı anlarla yadda qalıb.

Lakin məktəblərdən birində çəkilən fotolar sosial şəbəkələrdə müzakirə yaradıb.Fotoda məzunların “Son zəng” ənənəsi olaraq üzərində təbrik və ürək sözləri yazılan məktəb köynəklərində “oğru dünyası”na xas əlamətlərə üstünlük verildiyi görünür.

Sosial şəbəkə istifadəçiləri bunu gənclərin “oğru dünyası”na, “qanuni oğru”lara, kiminal aləmə meyilinin günbəgün artması ilə izah edir və bunun mənfi nəticələri olacağını bildirirlər.Bəs 11-ci sinifi bitirib müstəqil həyata qədəm qoyan gənclərin bu cür təhlükəli maraqlara yönəlməsi nə ilə bağlıdır? Cəmiyyətdə onların kriminal aləmə marağının artması hansı sosial səbəblərlə izah oluna bilər? Bu gəncləri bu yoldan çəkindirmək üçün hansı addımlar atılmalıdır?

Mövzu ilə bağlı “Cebhinfo.az”-a açıqlamasında psixoloq-pedaqoq Zeynəb Əyyubova qeyd edib ki, bu yaşda gənclərin "oğru dünyasına" meyili ciddi sosial siqnaldır.

Onun sözlərinə görə, 11-ci sinfi bitirən gənclər artıq həyatlarının keçid dövrünü yaşayırlar, yəni uşaqlıqdan gəncliyə keçirlər:

“Bu mərhələdə onlar kimlik axtarışındadırlar və fərqli olmaq, seçilmək ehtiyacı hiss edirlər. Təəssüf ki, bəziləri üçün bu “seçilmə” üsulu kriminal aləmə meyillənmə ilə ifadə olunur.

Sosial mediada “qəhrəmanlaşdırılan” “qanuni oğru” obrazları, kriminal seriallar, musiqilər və təsirli nitqlər gənclərdə bu dünyaya maraq oyadır. Əslində bu təkcə fərdi bir davranış deyil, geniş yayılarsa, gələcəkdə bir nəsil üçün kriminallaşma təhlükəsi yarada bilər.

Cəmiyyətin əxlaqi və hüquqi əsasları sarsılır. Gənclərin bu cür meyilləri normal qarşılaması, cinayətkar həyat tərzinin “prestijli” kimi görünməsi təhlükəli bir trendə çevrilə bilər".

Psixoloq qeyd edib ki, burada əsas məsuliyyət ailələrin, məktəblərin və media qurumlarının üzərinə düşür:

"Bu cür hallarla qarşılaşmamaq üçün ailələr övladları ilə mütəmadi ünsiyyətdə olmalı, onları tənqid etmədən dinləməli və yönləndirməlidirlər. Məktəblər təkcə akademik bilik yox, eyni zamanda sağlam dəyərləri aşılamalı, müasir dövrün real qəhrəmanlarını tanıtmalıdır.

Bundan başqa, media bu cür halları ifşa etməklə yanaşı, eyni zamanda bu davranışların arxasındakı səbəbləri və fəsadları göstərməlidir. Cinayət aləmini romantikləşdirmək əvəzinə, onun dağıdıcı nəticələri göstərilməlidir".

O bildirib ki, gənclərə düzgün model təqdim olunmalıdır:

"Gəncləri anlamağa çalışaq. Onlar qaranlıqda qalanda, yanlış yollara meyil edirlər. Əgər bir gənc diqqət görmürsə, bu diqqəti neqativ şəkildə səs-küy salaraq, sərhəd pozaraq, diqqət mərkəzinə düşərək qazanmağa çalışır. Biz isə onları düzgün yolu seçmələrinə yardım etməliyik".