“Albaniyada keçirilən “Avropa Siyasi Birliyi”nin 6-cı Zirvə toplantısı daha geniş tədbir idi. Burada Avropa İttifaqının üzvü olmayan ölkələr də təmsil olunurdu. Bu, Avropa İttifaqının kənarında və ya davamı olan hərakat kimi görünürdü”.

Bunu “Reytinq” qəzetinə açıqlamasında Azərbaycanın sabiq xarici işlər naziri Tofiq Zülfüarov deyib.

Zirvə toplantısı çərçivəsində Avropa İttifaqı ilə Azərbaycanın rəhbər şəxslərinin görüşlərinə gəlincə, sabiq nazir bildirib ki, baş verənlərə daha böyük və geniş aspektdən yanaşmaq lazımdır:

“İndi Avropa heç də asan günlər yaşamır. Xüsusilə, Avropa ABŞ-la açıq iqtisadi rəqabətdədir, bunun nəticəsində siyasi rəqabət də artır. Donald Trampın prezident postuna gəlişindən sonra vəziyyət dəyişib. İndi Avropa ideoloji əsaslardan qaynaqlanan addımlardan daha konkret iqtisadi maraqları özündə ehtiva edən məntiqə gəlir. Yəni iqtisadi-siyasət məntiqi üzərindən qurulan münasibətlərə”.

Onun sözlərinə görə, iqtisadi rəqabət, ticarət qarşıdurmaları, Ukryna böhranı və digər halların Avropaya ciddi təsiri var. Bu isə Avropanı vəziyyətə real baxmağa, məntiqi yanaşmalar ortaya qoymağa sövq edir.

T. Zülfüqarov əlavə edib ki, Fransa prezidenti Emmanuel Makronun ermənipərəst olduğunu bilməyən yoxdur. Amma Avropanın real vəziyyəti, ümumilikdə dünyada baş verən proseslər hər kəsi məcbur edir ki, Avropa-Azərbaycan münasibətlərinə real baxsın.

Keçmiş nazirin fikrincə, Avropanın önəmli iqtisadi əməkdaşlıq istiqaməti Asiyadır: “Belə iqtisadi əməkdaşlıq üçün yollar və kommunikasiya vacibdir. Bu kommunikasiya da Azərbaycan və Türkiyədən keçir. Bu baxımdan dünyada baş verən geopolitik maraqların yenidən qiymətləndirilməsi Albaniyada keçirilən “Avropa Siyasi Birliyi”nin görüşündə özünü göstərdi”.

Müsahimiz qeyd edib ki, Azərbaycanla Avropa Birliyi kommunikasiya və enerji təchizatı istiqamətində etibarlı tərəfdaşdır:

“Üstəlik, Azərbaycanın yerləşdiyi məkanın mürəkkəb olmasına rəğmən Azərbaycan müstəqil siyasət həyata keçirir, NATO dövləti olan Türkiyə ilə müttəfiqdir. Türk Dövlətlər Birliyinin əsas təşəbbüskarlarından biridir ki, bu da, gələcəkdə böyük geopolitik ərazini əhatə edə bilər. Ümumi prosesləri sadaladıqda Azərbaycan prezidentinin həmin tədbirdə iştirakı əhəmiyyətli hadisədir”.

T. Zülfüqarov hesab edir ki, baş verənlər Avropa İttifaqında Azərbaycanla bağlı Fransanın yaratdığı süni problemləri aradan qaldıracaq və sağlam məntiq əsasında əlaqələrin qurulmasına səbəb olacaq. Dünyadakı geopoltik maraqlar bunu tələb edir.