“Hazırda dünya bazarında taxılın qiymətində cüzi də olsa, artım müşahidə olunur. Bu səbəbdən dəyirmanlar taxılın yeni qiymətinə görə istehsalın hesablanmasına başlayıblar və buna görə bazara daha az un çıxarırlar. Bu da onu göstərir ki, bir müddət sonra unun qiyməti balahaşa bilər”.
Bunu Bakupost.az -a iqtisadçı ekspert Natiq Cəfərli bildirib.
O qeyd edib ki, bizim xaricdən aldığımız taxıl, yaxud unu yerli taxıla qatmaqla çörək hazırlanır:
Bakupost.az
"Təəssüf ki, Azərbaycanda istehsal olunan taxılın keyfiyyəti o qədər də yüksək deyil. Ona görə də xarici ölkələrdən alınmış taxılla qarışdırılmalıdır ki, hazırlanan çörək keyfiyyətli olsun. Unun qiymətində artım məhz bununla bağlı ola bilər. Azərbaycan özünü təxminən 24-25 faiz taxılla təmin edə bilir. Qalan hissəni xaricdən alırıq. Dünya bazarında taxıl qiymətləri nə qədərdirsə, biz də ondan asılıyıq. 70-75 faiz əmtəəlik buğdanı xaricdən alırıq. Xaricdə hər hansısa qiymət dəyişikliyi olan kimi Azərbaycan bazarlarında da qiymətlərin dəyişməsi baş verir. Son illər taxıl aldığımız üç ölkə -Ukrayna, Rusiya və Qazaxıstan idi. Ukraynadan müharibəyə görə taxıl almaq xeyli çətinləşib. Hətta mümkünsüz hala gəlib. Rusiya isə öz daxili tələbatını ödəmək üçün taxıl ixracı ilə bağlı tez-tez qadağalar qoyur. İndi əsas bazarımız Qazaxıstandır".
