Mayın 23-də Azərbaycan Tibb Universitetində Həmkarlar İttifaqı Komitəsinin
təşkilatçılığı ilə Azərbaycan-Türkiyə qardaşlığına həsr olunmuş “Bu ellərin soyu birdir,
kökü bir” adlı təntənəli ədəbi-bədii gecə keçirilib. Tədbirdə ATU rəhbərliyi, professor-
müəllim heyəti, tələbələr, tanınmış ictimai xadimlər, o cümlədən Türkiyənin
Azərbaycandakı səfiri Cahid Bağçı xanımı ilə birgə iştirak edib.
Tədbirin aparıcıları - Müalicə-profilaktika fakültəsinin 1-ci kurs tələbəsi Aydan
Qocayeva, 3-cü kurs tələbəsi Nigar Babayeva bildiriblər ki, may ayı istər Azərbaycan,
istərsə də qardaş Türkiyənin həyatında, o cümlədən Ulu Öndər Heydər Əliyevin və
Türkiyə Cümhuriyyətinin banisi Mustafa Kamal Atatürkün həyatında önəmli yerə
malikdir. Belə ki, mayın 10-u Heydər Əliyev, 19-u isə Mustafa Kamal Atatürkün
doğum günləridir. Hər il mayın 19-u Atatürkü anma, Gənclik və İdman Bayramı kimi
qeyd olunur. Mayın 28-i isə Azərbaycan Xalq Cümhuriyyətinin yarandığı gündür.
Bu əlamətdar tarixlərə həsr olunmuş tədbirdə əvvəlcə Türkiyə və Azərbaycanın
torpaqları uğrunda canlarını fəda etmiş şəhidlərimizin ruhu bir dəqiqəlik sükutla yad
edilib. Sonra söz musiqiyə verilib. Tələbələr “İncəbellim” mahnısını ifa ediblər.
Tədbirdə iki xalqın qardaşlığına dövlət başçıları səviyyəsində göstərilən xüsusi diqqət
önə çəkilib. Bu il fevralın 14-də ölkə başçısı İlham Əliyevin andiçmə mərasimində
səsləndirdiyi fikirlərdən sitat gətirilib: “Bizim ailəmiz türk dünyasıdır. Türk Dövlətləri
Təşkilatına üzv olan bütün ölkələrlə qardaşlıq münasibətimiz var və bizim siyasətimiz
Türk Dövlətləri Təşkilatını gücləndirməkdir. Bu, böyük coğrafiyadır, böyük ərazidir,
böyük hərbi gücdür”.
“Çinar” rəqs ansamblının “Nəlbəki” rəqsini ifa etməsinin ardınca Türkiyə Prezidenti
Rəcəb Tayyib Ərdoğanın 2018-ci ildə Bakının azad edilməsinin 100 illiyinə həsr
olunmuş tədbirdəki tarixi çıxışından bir hissə nümayiş olunub: “Dəyərli dostlarım,
Azərbaycanın sevinci bizim sevincimiz, qüruru bizim qürurumuzdur. Dərdi, ağrısı,
problemi də bizim problemimizdir. Azərbaycan kədərlənərsə biz də kədərlənərik,
Azərbaycan sevinərsə, biz də sevinərik”.
Azərbaycan Tibb Universitetinin qardaş ölkədən olan tələbəsi Liva Bitməzin ifa etdiyi
“100 il marşı” böyük coşqu ilə qarşılanıb. Həmçinin Türk tarixinə qızıl hərflərlə
yazılmış Çanaqqala döyüşü, qardaş Azərbaycan türklərinin döyüşdə göstərdiyi
qəhrəmanlıq və fədakarlıqlar xatırlanıb. Azərbaycandan köməyə gələnlərdən 284
nəfərin bu döyüşdə şəhid olduğu diqqətə çatdırılıb.
MPF-nin 5-ci kurs tələbəsi Ülkər Gülmalıyevanın ifa etdiyi “Mən azərbaycanlıyam”
mahnısı tədbirə xüsusi rəng qatıb. Onun ifası zamanı monitorda Ulu Öndərin
“Azərbaycan” şeirini səsləndirməsi nümayiş etdirilib.
Azərbaycanın dar günündə də Türkiyənin yardıma yetişməsi, xüsusilə 1918-ci ildə Nuru
Paşanın komandanlığı altında Bakının işğaldan azad edilməsi ehtiramla xatırlanıb.
Sonra MPF-nin 6-cı kurs tələbəsi Fatimə Mirkazımlının pianoda müşayiəti ilə “Lalələr”
mahnısı səsləndirilib. “Şəfa” xalq çalğı alətləri ansamblının üzvləri öz rəqsləri ilə tədbiri
daha da canlandırıb.
Universitetimizdə təhsil alan 3 minə yaxın əcnəbi tələbə arasında qardaş Türkiyədən
olanların çoxluq təşkil etdiyi də diqqətə çatdırılıb: “Bu gün ATU-da 48 ölkədən 3 minə
yaxın tələbə və dinləyici təhsil alır. Bunlardan 1305 nəfəri Türkiyə Cümhuriyyətinin
payına düşür. Onların 846-ı tələbə, 459-u isə dinləyicidir”.
İki ölkə arasında qardaşlıq əlaqələrinin ildən-ilə daha da güclənməsinin şərəfinə
Stomatologiya fakültəsinin 3-cü kurs tələbəsi Cansu Gülzerin ifa etdiyi “Sizə salam
gətirmişəm” mahnısı, MPF-nin 1-ci kurs tələbəsi Sezer Çelikin
“Çabuk böyü, çabuk yetiş, tez oğlum,
Vatanına göz dikeni ez oğlum”
misraları ilə başlanan “Bil oğlum”, MPF-nin 2-ci kurs tələbəsi Enes Emrenin Xocalı
soyqırımına dair Abdurrahim Karakoçun yazdığı “Qarabağa məktub”, MPF-nin 4-cü
kurs tələbəsi Nihat Salahlının “Ay Laçın”, Əczaçılıq fakültəsinin 3-cü kurs tələbəsi
Sona Əkbərlinin “İki dövlət, bir millət” şerlərini səsləndirməsi zalda hərarətlə
qarşılanıb. “Çinar” rəqs ansamblı üzvlərinin təqdim etdiyi “Zəngəzur yallısı” tarixi
torpaqlarımız olan Zəngəzur, İrəvan, Göyçəni bir daha xatırladıb. Əhməd Cavadın
“Çırpınırdı Qara dəniz”i isə zalda əyləşənlərin birgə ifası ilə başa çatıb.
Azərbaycan və Türkiyə bayraqlarının Hərbi tibb fakültəsinin tələbələri tərəfindən
səhnəyə gətirilməsi və adıçəkilən fakültənin tələbəsi Şövqi Tağızadənin çıxışı zalda
coşquya səbəb olub:
“...Qovuşacaq bölünənlər, bölənlər,
Nurlanacaq qaranlıqlar, kölgələr,
Diriləcək Oğuzxanlar, Bilgələr,
Türkə səcdə, türkə təzim olacaq,
Bugün-sabah dünya bizim olacaq!
Bugün-sabah dünya Türkün olacaq!”
Və ardınca zalda dalğalanan ay-ulduzlu bayraqlara baxaraq səsləndirdiyi fikirlər tədbir
iştirakçılarını ayağa qaldırıb və alqışlara səbəb olub:
“...Ürəyimdə bir dilək var!
O da doğru kəsilsin!
O gün olsun bu bayraqlar
İrəvanda, Zəngəzurda
Turan üstə açılsın!
Turan üstə açılsın!
Yaşasın Azərbaycan, Türkiyə!
Yaşasın Azərbaycan-Türkiyə qardaşlığı!”
diaaz.space
