İyunun 1-də Ukraynanın Rusiya hərbi aerodromlarına hücumu müharibənin daha təhlükəli fazaya daxil olmasından xəbər verir.

Reyting.az-ın məlumatına görə, “Wall Street Journal”-ın təhlilində qeyd olunur ki, hər iki tərəf vəziyyəti gərginləşməyə hazırlaşır və ABŞ-nın vasitəçiliyi ilə sülh sazişinin perspektivləri əlçatmaz görünür.

Bildirilir ki, 40 aylıq yorucu müharibə səngimək əvəzinə, ABŞ prezidenti Donald Trampın minimal müqaviməti ilə qızışır.

Sual olunur ki, artan hücumlar ABŞ administrasiyasını sülh prosesində daha dərindən iştiraka sövq edəcəkmi və yaxud ABŞ rəsmiləri dəfələrlə təhdid etdikləri kimi, geri çəkiləcəklərmi? Baxmayaraq ki, bəzi analitiklər Trampın müharibədən əl çəkəcəyi ilə bağlı vədini real saymır.

ABŞ-nın Ukraynadakı keçmiş səfiri Uilyam Taylor deyib ki, geri çəkilmək döyüşləri uzadar. Onun sözlərinə görə, geri çəkilmək uğursuzluğun etirafı olardı.

Nəşr yazır ki, Rusiya lideri Vladimir Putin hələ də Trampın Ukrayna ilə daha çox məşğul olmaq istəmədiyinə, onun əlavə sanksiyalar tətbiq etməkdən və ya ABŞ-nın Ukraynaya irimiqyaslı silah satışını bərpa etməkdənsə, münaqişədən çəkilməyi üstün tutduğuna inanır. Analitiklərin fikrincə, Tramp administrasiyasının ərazi güzəştləri və digər təşviqlər müqabilində Putini döyüşü dayandırmağa çağırmaqdan başqa strategiyası varsa da, o, hələ bunu açıq şəkildə ifadə etməyib:

“Tramp Rusiyaya iqtisadi və hərbi təzyiqi artırmağa çalışmadı. O, gələcək silah ehtiyaclarını koordinasiya etmək də daxil olmaqla, Ukraynanın müdafiə planlaşdırılmasında fəal iştirak etməyib. O, Ukraynanın Rusiya bazalarına pilotsuz uçan aparatlardan zərbələr endirməsi ilə bağlı qeyri-adi şəkildə susur.

Zelenski bazar ertəsi jurnalistlərə deyib ki, Türkiyə prezidenti Rəcəb Tayyib Ərdoğan dörd ay sonra Putinin özünün də görüş keçirməsini təklif edib. Ancaq administrasiya Trampın bu prosesdə iştirak edib-etməyəcəyini açıqlamayıb”.

Nəşr proqnozlaşdırır ki, Kreml cəbhə xəttini dəyişməyə çalışır və beynəlxalq təzyiqlər olmasa, bu yay döyüşlər daha da güclənəcək.

Qeyd edək ki, Ukrayna və Rusiya arasında iyunun 2-də İstanbulda keçirilən qısa görüş humanitar məsələlərdə irəliləyişə səbəb olsa da, tərəfləri atəşkəsə doğru aparmayıb. Hər halda, Rusiya dövlət mediasının yazdığı Kremlin təklifi Moskvanın son bir neçə ayda irəli sürdüyü maksimalist tələblərdən az fərqlənir: Ukraynanın dörd mübahisəli ərazisinin Rusiyanın bir hissəsi kimi rəsmi tanınması, Ukrayna qoşunlarının həmin ərazilərdən çıxarılması və Kiyevin NATO-ya üzv olmaq və ya onun Avropa İttifaqına daxil olmasının qarşısını alacaq siyasətə sadiq qalması. Bu, Rusiyanın başladığı müharibəni davam etdirməkdə qərarlı olduğuna daha bir işarədir. Ukrayna isə öz müdafiəsində cəsarətli addımlar atmağa davam edəcək.