Ukraynanın sosial və marketinq araşdırmaları “Socis” mərkəzinin araşdırmasına görə, ölkə Prezodenti Volodimir Zelenskinin Ukraynadakı seçicilər arasında reytinqi 2024-cü il ərzində aşağı enərək 15,9%-ə düşüb.
Yeniavaz.com xəbər verir ki, Prezident seçkiləri indi keçirilsəydi, bu qədər ukraynalı ona səs verəcəkdi.
Araşdırma mərkəzinin məlumatına görə, Zelenskinin reytinqi yalnız yayda - 1% artıb və ümumilikdə 2024-cü ilin fevralında 21,7%-dən bu ay 15,9%-ə düşüb.
Eyni zamanda, Ukrayna Silahlı Qüvvələrinin keçmiş baş komandanı Valeriy Zalujnının reytinqi də 2024-cü ilin əvvəlində, o, baş komandan vəzifəsindən azad edildikdən və uzun müddət media məkanından yoxa çıxanda aşağı düşsə də, payızda artmağa başlayıb və hazırda 27,2% təşkil edir. Beləliklə, seçkilərin birinci turunda Zelenski yalnız ikinci yeri tutacaqdı. Üçüncü yerdə 5,8 faizlə Ukraynanın keçmiş prezidenti Pyotr Poroşenko qərarlaşıb.
Qeyd edək ki, çərşənbə axşamı ABŞ Prezidenti Donald Tramp deyib ki, Zelenskinin reytinqi 4%-ə düşüb və Ukrayna sülh masasında yer almaq istəyirsə, seçki keçirməlidir. Fevralın 19-da səhər saatlarında Kiyev Beynəlxalq Sosiologiya İnstitutu hesabat dərc edib. Hesabata görə, fevralın əvvəlinə olan məlumata görə, ukraynalıların 57%-i Zelenskiyə inanır.
Ukraynada prezident seçkiləri 2024-cü ilin martında keçirilməli idi. Hakimiyyət onların olmamasını hərbi vəziyyətlə izah etdi, lakin bir çox ekspertlər qeyd edir ki, hərbi vəziyyət tətbiq olunarsa, yalnız Ali Radanın səlahiyyətləri uzadılır, dövlət başçısının səlahiyyəti yox.