Gürcüstanın Baş naziri İrakli Kobaxidze Azərbaycana səfər edib. Baş nazir ölkəmizə səfəri çərçivəsində Azərbaycan Prezidenti İlham Əliyev və Baş nazir Əli Əsədovla təkbətək görüşlər keçirib. Həmçinin, iki ölkənin baş nazirlərinin rəhbərliyi ilə Gürcüstan-Azərbaycan İqtisadi Əməkdaşlıq üzrə Hökumətlərarası Komissiyasının 10-cu iclası keçirilib. Komissiyanın iclasında Gürcüstan və Azərbaycan hökumətinin üzvləri iştirak ediblər. İki ölkə arasında münasibətlərdə mövcud olan bütün məsələlər, müxtəlif sektorlardakı strateji tərəfdaşlıq müzakirə olunub. Gürcüstanın xarici işlər naziri Maka Boçorişvili deyib ki, Gürcüstan və Azərbaycan arasında iqtisadi əməkdaşlıq üzrə hökumətlərarası komissiyası çox mühüm formatdır. Gürcüstan ilə Azərbaycan arasında müxtəlif sahələrdə sıx əməkdaşlığın inkişafının müsbət dinamikası qeyd edilib. Regionda sülhün və sabitliyin vacibliyi də vurğulanıb. İ.Kobaxidze Gürcüstanın üçtərəfli dialoqa və regional əməkdaşlığın inkişafına kömək etməyə hazır olduğunu təsdiqləyib. Baş nazir Əli Əsədov Gürcüstan və Azərbaycan arasında iqtisadi əməkdaşlıq üzrə Hökumətlərarası Komissiyanın 10-cu iclasının açılışında deyib ki, Gürcüstanla əlaqələrin inkişafı Azərbaycanın xarici siyasətinin prioritet istiqamətlərindən biridir. Baş nazirin sözlərinə görə, iki ölkə arasında strateji tərəfdaşlıq keyfiyyətcə yeni səviyyəyə yüksəlib: “Hörmətli baş nazir, Gürcüstanla əlaqələrin inkişafı Azərbaycanın xarici siyasətinin prioritet istiqamətlərindən biridir. Ötən müddət ərzində strateji tərəfdaşlığımız keyfiyyətcə yeni səviyyəyə yüksəlib. Bu əməkdaşlıq bütün mühüm sahələri əhatə edir və 140-a yaxın sənəd daxil olmaqla geniş hüquqi bazaya malikdir. Ölkələrimiz arasında fəal siyasi dialoq mövcuddur. Biz beynəlxalq təşkilatlar çərçivəsində həmişə bir-birimizi dəstəkləyirik. Çətin anlarda hər zaman bir-birimizin yanındayıq. Bu ənənə bu gün də davam edir. Mən xüsusilə ərazi bütövlüyü mövzusunda qarşılıqlı dəstəyi qeyd etmək istərdim. İqtisadi-ticari əməkdaşlığımız həmişə çox vacibdir. Gürcüstan Azərbaycanın əsas ticarət tərəfdaşlarından biridir. Düzdür, ötən il ticarət dövriyyəmiz bir qədər azalıb, amma əminəm ki, bu, müvəqqəti xarakter daşıyır. Biz iqtisadi potensialı tam reallaşdırmaq üçün lazımi addımları atmalıyıq. Bu məsələ şübhəsiz ki, diqqət mərkəzində olacaq”. İrakli Kobaxidze bildirib ki, Gürcüstan Cənubi Qafqazda üçtərəfli əməkdaşlıq təşəbbüsünü təklif edir: "Biz regionda konkret praktiki addımların atılmasında və əməkdaşlığın təşviqində maraqlıyıq, Gürcüstan tərəflərə Cənubi Qafqazın hər üç ölkəsinin müxtəlif sahələrdə iştirakını nəzərdə tutan üçtərəfli əməkdaşlıq təşəbbüsünü təklif edir". İ.Kobaxidze qeyd edib ki, komissiyanın iclası iki ölkə arasında dinamik əməkdaşlığa təkan verəcək: "Hər dəfə səfərimiz zamanı öz gözəlliyi və inkişaf tempi ilə bizi heyran edən bir şəhərdə - Bakıda olmaq mənim üçün böyük şərəfdir. Mən şadam ki, ilk dəfə olaraq 10-cu Gürcüstan-Azərbaycan Hökumətlərarası İqtisadi Əməkdaşlıq Komissiyasına həmsədrlik etmək imkanı əldə edirəm. Mən dərindən əminəm ki, bugünkü görüş ölkələrimiz arasında strateji tərəfdaşlığın daha da dinamik və səmərəli olması üçün, ölkələrimiz arasında əməkdaşlığın genişləndirilməsi üçün yeni imkanlar açacaq. Fürsətdən istifadə edərək, Azərbaycanı BMT-nin COP-29 konfransının uğurla keçirilməsi münasibətilə təbrik etmək istərdim. Şadam ki, COP-29-un işində iştirak etmək imkanım oldu. Mən bir daha təsdiq etmək istəyirəm ki, Gürcüstan və Azərbaycan bir-birinin suverenliyini və ərazi bütövlüyünü qətiyyətlə dəstəkləyir və buna görə sizə təşəkkür etmək istəyirəm”. Onun sözlərinə görə, regionda və dünyada sürətlə dəyişən mürəkkəb geosiyasi vəziyyətdə regional inkişafın və davamlı rifahın əsas şərti kimi sülh və sabitliyə daha da böyük önəm verilir: “Əminəm ki, birgə səylərlə biz nəinki bütün çətinliklərin öhdəsindən gələcəyik, hətta daha səmərəli əməkdaşlıq üçün mövcud imkanlardan istifadə edəcəyik. Biz regionda konkret əməli addımların atılmasında və əməkdaşlığın təşviqində maraqlıyıq. Gürcüstan tərəflərə Cənubi Qafqazın hər üç ölkəsinin müxtəlif sahələrdə iştirakını nəzərdə tutan üçtərəfli əməkdaşlıq təşəbbüsü təklif edir".
İclasda qarşılıqlı investisiyaların həcminin artırılması ilə bağlı gündəlikdə duran məsələlər nəzərdən keçirilib. Neft-qaz sahəsində əməkdaşlığın əhəmiyyəti vurğulanıb. SOCAR tərəfindən Gürcüstanda həyata keçirilən layihələr barədə söhbət açıldı, gündəlikdə duran yeni perspektivli layihələrə toxunulub. Azərbaycan ilə Gürcüstanın birgə həyata keçirdiyi meqa layihələr uğurlu regional əməkdaşlıq nümunəsi kimi dəyərləndirilib. Bu layihələrin Cənubi Qafqazın transformasiyasına xidmət etdiyi, bölgənin enerji və nəqliyyat xəritəsini dəyişdiyi diqqətə çatdırılıb. Cənub Qaz Dəhlizi layihəsinin reallaşmasında iki ölkənin önəmli rolu qeyd olunub. Eyni zamanda Azərbaycan və Gürcüstanın iştirakı ilə Avropaya yaşıl enerji körpüsünün salınmağa başlanılmasından məmnunluq ifadə olunub. Nəqliyyat-tranzit sahəsi ikitərəfli əməkdaşlığın ən vacib istiqamətlərindən biri kimi dəyərləndirilib. Bakı-Tbilisi-Qars dəmir yolunun tam gücü ilə işə salınması üçün birgə səylərin əhəmiyyəti vurğulanıb. Qeyd olunub ki, Azərbaycanın əlavə sərmayəsi və Gürcüstan tərəfinin səyləri nəticəsində bu yolun yükaşırma qabiliyyəti 1 milyon tondan 5 milyon tonadək artırılıb. Mədəni-humanitar sahədə əməkdaşlığın uğurlu nəticələri təqdir edilib. İclasın yekununda Baş nazirlər Əli Əsədov və İrakli Kobaxidze Azərbaycan Respublikası ilə Gürcüstan arasında iqtisadi əməkdaşlıq üzrə birgə hökumətlərarası komissiyanın 10-cu iclasının Protokolunu imzalayıblar.
AMİP Siyasi Şurasının üzvü, siyasi şərhçi Əli Oruclu "Sherg.az"a bildirib ki, Gürcüstanda keçirilən son parlament seçkilərindən sonra formalaşan parlamentə, hökumətə və prezidentə münasibət birmənalı olmayıb. Ekspertin sözlərinə görə, Qərb və gürcü müxalifəti həmin seçkilərin legitimliyini tanımadığını elan etdi. Lakin Gürcüstandakı müxalifətin təşkil etdiyi hökumət əleyhinə kütləvi etirazlar demək olar ki, səngiyib:
"Müxalifət və onun qərbli dəstəkçiləri Gürcüstan iqtidarına qarşı davamlı basqılarına baxmayaraq, istəklərinə çata bilmədilər. Nəticədə hökumət öz siyasi kursunu davam etdirməkdədir. Gürcüstanda daxili ictimai-siyasi durumun sabitləşməsi Azərbaycanın da marağındadır. Gürcüstan Azərbaycanın ən yaxın tərəfdaşıdır. İki ölkə arasında əlaqələrin dinamikasında hər iki tərəf bəhrələnir. Azərbaycanın dünya bazarına çıxış əldə etməsində Gürcüstan vacib faktordur. Xüsusən də enerji və nəqliyyat kommunikasiya xətləri məhz Gürcüstan üzərindən keçir. Bakı-Tbilisi-Ceyhan (BTC) neft kəməri, Bakı-Tbilisi-Ərzurum qaz kəməri və Cənub Qaz Dəhlizi layihələri uğurla fəaliyyət göstərir. İstifadədə olan Bakı-Tbilisi-Qars dəmir yolu, eyni zamanda Orta Dəhliz transmilli layihələri də Bakı ilə Tbilisini bir-birlərinə sıx bağlayır".
Analitikin fikrincə, digər əsas faktorlardan biri də Gürcüstanda yaşayan 700 minə yaxın soydaşımız və milli-etnik, tarixi mədəni bağların olmasıdır:
"O səbəbdən Tbilisi ilə Bakı arasında həm dostluq, mehriban qonşuluq, həm də strateji müttəfiqlik var. Bu gün Gürcüstanla Azərbaycanı daha da yaxınlaşmasında artan xarici basqılar və təhlükəsizliklə bağlı problemlər də öz təsirini göstərir. Hər iki Cənubi Qafqaz ölkəsi müstəqil siyasət yürütdüyünə görə, Qərbin haqsızlığı ilə üzləşib. Bu təzyiqləri birgə önləmək yaxşı effekt verə bilər. Gürcüstan baş nazirinin Azərbaycana gerçəkləşdirdiyi ilk rəsmi səfəri və keçirdiyi yüksək səviyyəli görüşlər qarşılıqlı əlaqələrin daha da inkişafına yeni üfüqlər açır. Bunun ardınca Bakıda Türkiyə və Azərbaycan arasında baş tutacaq görüş regional əməkdaşlıq üçün yeni töhfələr verəcək. Heç şübhəsiz ki, Ermənistan üzərindən Qərbin Cənubi Qafqaza nüfuz etməyə can atmasının hansı fəsadlar törədəcəyi Tbilisini də qayğılandırır".
