O, gözəl səs imkanlarına malikdir. Səsləndirdiyi mahnıları ürəklə ifa edir. Deyir ki, burada gen faktoru böyük rol oynayır. Əgər Qarabağlı olmasaydı, bu səs imkanlarına sahib olmazdı. Moderator.az-ın qonağı gənc ifaçı, pedaqoq Arzu Şuşalıdır.
- İncəsənət aləmində Şuşa təxəllüslü tanınmışlar kifayət qədərdir. Şuşa ləqəbini seçərkən bunu nəzərə aldınızmı?
- Mən Şuşanı heç zaman görməmişəm. Dünyaya gəldikdə artıq Şuşa işğal olunmuşdu. Uşaqlığım, yeniyetməliyim Şuşanı xəyal etməklə keçib. Onun adını da ləqəb olaraq götürməkdə peşman deyiləm. Qarabağlıyam və bununla fəxr edirəm.
- Şuşa ilə bağlı xəyallarınız, arzularınız varmı?
- Torpaq sevgisi bizə uşaqlıqdan aşılanıb. Biz o torpaqları sevərək böyüdük. Arzularımın, xəyallarımın ilki məhz Şuşa ilə başlayıb. Xoş günlərimizi o torpaqlarda yaşamağı xəyal etmişik. İndi arzularımıza bir addım daha yaxınıq. Şuşaya getmək üçün sayılı günlərimiz qalıb. 28 ildir ki, o torpaqlara qovuşacağımız günü gözləyirik, ancaq bir neçə ayı gözləməkdə daha çox səbirsizlənirik. Uşaq yaşlarımızda arzu edirdim ki, Şuşaya gedib baba evimizi görəcəm, ancaq işaldan azad olunmuş Şuşamızdan nümayiş olunan çəkilişlərə baxanda həyətimizdə təkcə qoz ağacının qaldığını gördüm. Bu, bizi məyus etdi, çünki valideynlərimin o evlə bağlı xatirələri vardı. Ancaq ümid edirəm ki, biz o torpaqlara getdikdən sonra yeni xatirələrimiz olacaq.
- Siz burada doğulmusunuz və uşaqlığınız da burada keçib. Şuşaya köçüb orada yaşamağı düşünürsünüz?
- Əlbəttə, Şuşaya sevərək gedəcəm. Şuşa haqqında atam çox gözəl xatirələrini danışıb. Oranı bizə cənnət kimi təqdim edib. Düşünürəm ki, gedib Şuşanı görsəm, Bakıya gəlməyəcəm. Böyük ehtimal ki, elə gələcəkdə də Şuşada yaşayacam. Düzdür, bütün yaradıcılığım, işim buradadır. Ancaq hesab edirəm ki, Şuşada da Mədəniyyət evi, Musiqi Konservatoriyası fəaliyyət göstərəcək. Orada fəaliyyətimi davam etdirəcəm.
- İfaçılıqla yanaşı, hansı işləri görürsünüz?
- İfaçılıqla yanaşı, pedaqoq olaraq fəaliyyət göstərirəm. Belə ki, Azərbaycan Dillər Universitetində musiqi tədris edirəm. Daha çox xarici vətəndaşlar müraciət edir, xalq mahnılarımıza maraq göstərirlər.
- Yaradıcılığınızda Qarabağ həsrəti nə qədər rol oynayır?
- Mən qarabağlıyam. Damarlarımda qarabağlı qanı axır. Hesab edirəm ki, məhz bu səbəbdən Allah mənə istedad verib. Səs Allahın verdiyi bir nemətdir ki, mən bu neməti gen faktoru ilə daha çox əlaqələndirirəm. Atamın da çox gözəl səsi olub. Bu səs mənə atamdan keçib.
- Şuşanın işğaldan azad olunması xəbərini necə qarşıladınız?
- Bu xəbəri eşidəndə sevincimizin həddi-hüdudu yox idi. O qədər ağladım ki... Sonunda mən Şuşaya qovuşdum və ata yurdumu, torpağımı görəcəyim günün xəyalını qurdum. Yəqin ki, ora gedəndə hər birimiz sevincdən ağlayacağıq.
- Yəqin ki, Qarabağlı qızı olaraq toyunuzu da Şuşada edərsiniz?
- Qismət. Şuşalının toyu Şuşada olar (gülürük). Başqa variant yoxdur. Mənim bütün əzizlərim Şuşaya, doğma torpaqlarına gedəcək. Ailəm haradadırsa, mən də orada olmalıyam. Rahatlıqla Şuşada toyumu edə bilərəm.
- Şuşaların özünəməxsus hər hansı adətləri varmı?
- Şuşalılar zəngin mədəniyyətə sahibdirlər. Onların qeyri-etik hərəkətini nadir hallarda görmək mümkündür. Özlərinə hörmət etməyi bacaran insanlardır. Şuşanın zəngin mətbəxi var. Bu mətbəxi çox sevirəm.
- Necə hesab edirsiniz, 28 il ərzində torpağından uzaq düşən Şuşalılar öz adət-ənənəsini qoruyub saxlaya biliblərmi?
- Torpağından ayrı düşən köçkünlər bu 28 ildə çox əziyyət çəkdilər. Təbii ki, elindən-obasından ayrı düşmələri onların həyat rejiminə təsir etdi. Ancaq bu illər ərzində hər birimiz adət-ənənəmizə sadiq qaldıq. Burada təkcə adət deyil, gen faktoru da böyük rol oynayır. İnsanın harada yaşamasından asılı olmayaraq, geni, adəti, aldığı tərbiyə hər zaman onu müşayiət edir. Misal üçün, mən gedib Türkiyədə də yaşasam, genim, aldığım tərbiyə nədirsə, övladlarımı da elə yetişdirəcəm. Bu, içdən gələn bir şeydir. Məkanı dəyişməklə insanın geni dəyişmir.
- Bundan sonra yaradıcılığınızda hər hansı dəyişiklik olacaqmı?
- Bundan sonra da vətənpərvər ruhda mahnılar səsləndirəcəm. Çox istərdim ki, Şuşaya köçüm və Cıdır düzündə klip çəkdirim. İnşallah, Allah məni bu arzuma çatdırar.
