İşlək sayğaclar 5 ildən bir niyə DƏYİŞDİRİLİR?
Bu gün, 08:39
Smart-kart tipli qaz sayğaclarının mexaniki sayğaclarla əvəzlənməsi ətrafında yaranan müzakirələr bitmir. Hələ 4 il öncə, 2020-ci ildə yeni inşa olunan çoxmərtəbəli binalar istisna olunmaqla bütün fərdi yaşayış evlərində dövri yoxlama müddəti bitmiş sayğaclar mexaniki sayğacla əvəzləndi. Elə həmin ildən də narazılıq yaranıb. Belə ki, abonent işlək vəziyyətdə olan smart-kart tipli sayğacının mexaniki sayğacla əvəzlənməsinə qarşıdır. Narazılıqla yanaşı “Azəriqaz” İB-nin əməkdaşları həm də sayğacı bəzən abonentin iştirakı və akta imzası olmadan dəyişdirirlər.
Bəzi abonentlərin iddiasına görə mexaniki qaz sayğaclarına istənilən müdaxiləni etmək mümkündür. Bəziləri isə iddia edirlər ki, smart-kart tipli qaz sayğacları mexaniki sayğaclarla əvəzləndikdən sonra qaz sərfiyyatı artıb.
Çoxluq smart tipli qaz sayğaclarından istifadəni üstün tutur. O baxımdan ki, smart sayğaclardan istifadə edən abonent qaz sərfiyyatına görə karta vaxtı-vaxtında balans artırmaqla daha məsuliyyətli olur. Mexaniki sayğacda isə proses əksinədir. Qaz sərfiyyatına görə ay sonu abonentə borc gəlir və bəzən böyük məbləği bir anda ödəmək çətinlik çəkir.
Ümumiyyətlə smart-kart tipli sayğacın mexaniki sayğacla əvəzlənməsi hansı zərurətdən yaranır? İstehlakçının icazəsi və imzası olmadan sayğacların dəyişilməsi nə qədər doğrudur?
Məsələ ilə bağlı Bizim.Media-ya açıqlamasında “Azəriqaz” İstehsalat Birliyinin mətbuat katibi Eldəniz Vəliyev bunları deyib:
““Azəriqaz” İB dövri dövlət yoxlaması bitən sayğacları yeni sayğaclarla əvəz edir. Bu, abonentin özünün iştirakı ilə də olur. Olur ki, əməkdaşlar bir neçə dəfə ünvana gəlirlər, mənzildən ya kimsə buna şərait yaratmır, ya kimisə görə bilmədikləri üçün məcbur qalıb yeniləyirlər. Burada başqa bir məqsəd yoxdur. Yeni, daha müasir sayğacdır. Dövri dövlət yoxlaması keçən sayğacları beş ildən bir yoxlamaya göndərməyəndə onun ola bilsin ki, işləməsində, yazılmasında müəyyən qüsurlar əmələ gələ bilər”.
Smart-kart tipli sayğacların artıq istismara yararsız olduğu üçün mexaniki sayğacla əvəzlənməsinə gəldikdə isə qurum rəsmisi suala belə cavab verib.
“Smart sayğaclar Metrologiya Departamentinə göndərilir. Metrologiya Departamenti “Azəriqaz” İstehsalat Birliyinə aid olmayan bir qurumdur. Əvvəllər “Azəriqaz” İB-nin balansında idi, sonra Metrologiya İnstitunun tabeleyinə verildi. Yəni bu, “Azəriqaz” İB-nin səlahiyyəti çərçivəsində deyil. Onlar yoxlayıb, həmin sayğacın təkrar istismara gedib getməyəcəyinə qərar verirlər. Biz “Azəriqaz” olaraq mexaniki, yəni sonradan ödənişli sayğacların tətbiqinə başlamışıq. Məqsədimiz daha ağıllı sayğaclara nail olmaqdır. Həmin mexaniki sayğaclara xüsusi cihazlar quraşdırılacaq, o cihazlar vasitəsilə smart tipli daha ağıllı sayğaclara nail olacağıq. Onunla onlayn ödənişlər daha rahat olacaq, bundan sonra qapını döyməyəcəklər, məsafədən oxunma, eyni zamanda, debitor borca görə avtomatik kəsilmə, debitor borc ödənilən kimi dərhal, avtomatik olaraq qazın verilişinin bərpası və bu kimi üstünlüklərə onunla nail olacağıq”.
O, həmçinin bu sayğaclarda ödəniş qayğısının olmadığını bildirib:
“Abonentə ayda bir dəfə bildiriş verilir və 30 gün müddətində bu bildirişdəki borcu ödəyirsən”.
Maraqlıdır abonentin iştirakı olmadan qaz sayğacını dəyişdirmək mümkündürmü
Qurumdan bildirilib ki, 5 ildən bir qaz sayğaclarının götürülməsi və dövrü dövlət yoxlamasının aparılması tələb olunur. Qaydalar Antiinhisar və İstehlak Bazarına Nəzarət Dövlət Xidməti tərəfindən qoyulub. Əhali kateqoriyası 5 ildən bir, qeyri-əhali, yəni sahibkarlıq subyektlərinə aid dövrü dövlət yoxlamasının aparılması məcburi qaydadır.
Bu qaydada göstərilib ki, “Azəriqaz” İstehsalat Birliyinin əməkdaşları həmin sayğacların dövrü dövlət yoxlamasını aparan zaman mütləqdir ki, ev sahibinin iştirakı təmin olunsun. Ola bilər ki, ev sahibi evdə olmasın, 18 yaşına çatan övladları, digər ailə üzvləri evdə olmasınlar.
Geri qayıt