Xəbər verdiyimiz kimi, Prezident İlham Əliyev bir sıra rayonların icra başçılarının işdən azad edilməsi və yerinə yeni şəxslərin təyinatı ilə bağlı sərəncamlar imzalayıb. Bütün təyinatların icmalı olaraq bildirir ki, Kürdəmir, Göyçay, Göygöl, Naftalan və Gədəbəy rayonlarının icra başçıları vəzifələrindən azad olunub.
Dövlət başçısının sərəncamlarına görə, Kürdəmir, Göyçay, Göygöl, Qax, Balakən və Nəsimi Rayon İcra Hakimiyyətlərinə yeni başçılar təyin edilib. Demək olar ki, mütəmadi olaraq Ölkə Prezidenti tərəfindən icra hakimiyyəti sistemində köklü dəyişikliklərin reallaşmasının şahidi oluruq. İcra hakimiyyəti sistemində daha da uğurlu nəticələr əldə etmək üçün hansı dəyişikliklər edilməlidir? Prezidentin yeni icra başçılarından əsas gözləntiləri nədən ibarətdir?
Mövzu ilə bağlı siyasi şərhçi Saila Salahova Referans-a açıqlamasında Prezident İlham Əliyevin imzaladığı son sərəncamlara əsasən, Kürdəmir, Göyçay, Göygöl, Naftalan və Gədəbəy rayonlarının icra başçıları vəzifələrindən azad olunub, eyni zamanda Kürdəmir, Göyçay, Göygöl, Qax, Balakən və Nəsimi rayonlarına yeni icra başçıları təyin edilib. Bu qərarlar dövlət başçısının icra hakimiyyəti sistemində həyata keçirdiyi kadr yenilənməsi və idarəetmə islahatlarının növbəti mərhələsi kimi qiymətləndirilir. Son illərdə bu istiqamətdə ardıcıl addımların atılması bir daha göstərir ki, ölkə rəhbərliyi yerli səviyyədə idarəçiliyin keyfiyyətini yüksəltmək və dövlət siyasətinin icrasını daha səmərəli təşkil etmək məqsədi güdür. İcra hakimiyyətlərində aparılan dəyişikliklərin əsas məqsədi daha çevik, məsuliyyətli və vətəndaşyönümlü idarəetmə modelinin formalaşdırılmasıdır. Prezident İlham Əliyev dəfələrlə çıxışlarında qeyd edib ki, hər bir icra başçısı fəaliyyətini birbaşa xalqla ünsiyyət, şəffaflıq və hesabatlılıq prinsipləri əsasında qurmalıdır.
Müsahibimizin qənatinə görə, son illərdə bir sıra rayonlarda həyata keçirilən layihələr, sosial proqramlar və infrastruktur yenilikləri göstərir ki, dövlət siyasətinin uğurlu icrası məhz yerli rəhbərlərin peşəkarlığı və təşəbbüskarlığı ilə sıx bağlıdır.
Siyasi şərhçi onu da bildirib ki, yeni təyinatlar bu istiqamətdə idarəetməyə dinamizm gətirəcək və bölgələrdə sosial-iqtisadi inkişafın daha balanslı şəkildə davam etdirilməsinə şərait yaradacaq. Yeni təyin olunan icra başçılarından gözləntilər aydındır: Yerli əhalinin problemlərinə daha operativ və effektiv yanaşmaq, Sahibkarlığın və məşğulluğun inkişafına dəstək vermək, Dövlətin sosial proqramlarının icrasına fərdi məsuliyyətlə yanaşmaq, Vətəndaşlarla açıq ünsiyyət və ictimai etimad mühitini formalaşdırmaq.
"Bu prinsiplərin təmin edilməsi həm rayonların sosial-iqtisadi göstəricilərinə müsbət təsir göstərəcək, həm də dövlət siyasətinin bölgələrdə icrasını daha məqsədyönlü edəcək. Prezident İlham Əliyevin son sərəncamları bir daha göstərir ki, ölkədə idarəetmə sisteminin müasirləşdirilməsi, peşəkar kadr siyasətinin davam etdirilməsi və vətəndaş məmnunluğunun artırılması dövlət rəhbərliyinin əsas prioritetlərindəndir. Yeni icra başçılarının fəaliyyətində bu istiqamətlərin mərkəzə çəkilməsi, yerli idarəetmədə keyfiyyətcə yeni mərhələnin başlanğıcını formalaşdıracaq", - deyə siyasi şərhçi əlavə edib.
