Yersiz zarafat, nalayiq ifadələr fəhlə yoldaşının ölümünə səbəb oldu

Ali Məhkəmədə Masallıda tanışını qətlə yetirməkdə təqsirəndirilən Hüseynxan Cəfərovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Nazim Mövsümovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib.

İttihama görə, hadisə 2022-ci il iyunun 8-də Masallı rayonunda qeydəə alınıb.

Belə ki, 2002-ci il təvəllüdlü Hüseynxan Cəfərov iş yoldaşı, 1992-ci il təvəllüdlü Qadir Hüseynovu qətlə yetirib.

Məlumata görə, Hüseynxan Cəfərov Masallı şəhəri, Xətai küçəsində yerləşən topdansatış anbarında onunla birlikdə fəhlə işləyən Qadir Hüseynovla bir neçə dəfə onunla yersiz zarafatlar edərək özünün və ailə üzvlərinin ünvanına nalayiq ifadələr işlətməsi ilə bağlı aralarında şəxsi münasibətlər zəminində mübahisələri olub. Sonuncu dəfə Hüseynxan 8 iyun 2022-ci ildə, saat 17 radələrində işdə olarkən avtomaşına yük vurduqları zaman Qadirin kənarda dayanıb işləmədiyini görüb. Bu zaman o, Qadirə iradını bildirməklə işləməsini tələb edib. Qadir isə ona əhəmiyyət verməyib və aralarında şəxsi münasibətlər zəminində mübahisə baş verib. Mübahisə zamanı Qadir Hüseynxanın ünvanına yenidən nalayiq söyüşlər söyməsi səbəbindən onu cəzalandırmaq qərarına gəlib.

Bu məqsədlə Hüseynxan qəsdən sol əli ilə Qadirin sifətinə bir yumruq zərbəsi vurub, sonra onu yerə yıxıb döyərək öldürüb.

Hadisəni törədən Hüseynxanın barəsində Cinayət Məcəlləsinin 126.3-cü (qəsdən sağlamlığa xəsarət yetirmə, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham elan edilib.

Cinayət işi üzrə təqsirləndirilən şəxs qismində ifadə verən Hüseynxan ona elan olunmuş ittiham üzrə özünü qismən təqsirli bilib.

Lənkəran Ağır Cinayətlər Məhkəməsinin hökmü ilə Hüseynxan Cəfərov 10 il müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən edilib.