Gürcüstanda polisi yaralayan azərbaycanlı öldürüldü

Gürcüstan Daxili İşlər Nazirliyinin xüsusi təyinatlıları bir neçə bölgəni əhatə edən əməliyyat keçirib, 34 nəfər saxlanılıb.

Onların sırasında azərbaycanlı qanuni oğrularla birbaşa əlaqəsi olan, oğru söhbətləri təşkil edən və zorla xərac toplayan şəxslər də var. Xüsusi əməliyyat zamanı polis əməkdaşı yaralanıb.

Musavat.com xəbər verir ki, bu barədə daxili işlər nazirinin müavini Aleksandre Darağvelidze məlumat verib. Bildirilib ki, 5 cinayət işi üzrə aparılan genişmiqyaslı əməliyyat çərçivəsində saxlanılan şəxslərə qarşı cinayətkarlar aləminə üzv olmaq, kriminal aləmin fəaliyyətinə dəstək vermək və cinayətkar aləmin üzvünə müraciət etmək ittihamları irəli sürülüb. Onlardan bir neçəsinə qiyabi ittiham elan olunub. Əməliyyat zamanı Laqodexi bələdiyyəsinin Qabal kəndində 1973-cü il təvəllüdlü Mirzə Əliyev polisə silahlı müqavimət göstərib. O, xüsusi təyinatlılara atəş açıb, nəticədə əməkdaşlardan biri döş qəfəsindən ağır yaralanıb. Polis cavab atəşi ilə Mirzə Əliyevi zərərsizləşdirib. Nazirliyin açıqlamasında bildirilib ki, saxlanılan şəxslər uzun müddətdir qanuni oğrularla əlaqə saxlayır, onlardan təlimat alır və maliyyə mübahisələrinə müdaxilə edərək təhdid və zor tətbiq ediblər. Eyni zamanda cinayətkar qruplaşma üzvləri tərəfindən oğru söhbətləri təşkil olunub, şərtlərə əməl etməyən şəxslər cərimələnib və ölüm ilə hədələnib.

Məlumata görə, əməliyyat zamanı kriminal avtoritet kimi tanınan Elmuraz Məmmədov da saxlanılanlar arasında olub və prosesdə mühüm rol oynayıb. Axtarışlar zamanı şübhəlilərin evlərindən kompüter və mobil telefonlar, narkotik vasitələr, odlu silahlar və böyük məbləğdə pul götürülüb. İş üzrə Cinayət Məcəlləsinin bir neçə maddəsi, o cümlədən qanunsuz silah dövriyyəsi, qəsdən adam öldürməyə cəhd və mütəşəkkil cinayətkarlıq ittihamları ilə istintaq aparılır. DİN rəhbərliyinin açıqlamasında qeyd olunub ki, əməliyyatlar nəticəsində bir neçə il öncə qeydə alınmış qanunsuz silah dövriyyəsi faktı da ifşa edilib və şübhəlilərdən Davit Çubinidze həbs olunub, Davit Mikadze barəsində isə qiyabi ittiham veriləcək.

Faktlarla bağlı istintaq davam etdirilir, saxlanılan şəxsləri 15 ilədək azadlıqdan məhrumetmə cəzası gözləyir.