Ağcabədidə ailə dramı: boşanma qətllə nəticələndi

Ağcabədidə arvadını 11 bıçaq zərbəsi ilə öldürməkdə təqsirləndirilən şəxsin məhkəməsi keçirilib.

Trend-in məlumatına görə, hadisə ötın il noyabrın 1-də şəhərin İ.Qayıbov küçəsində baş verib.

Təqsirləndirilən şəxs izahatında bildirib ki,15 ildən çox müddətdə evli olublar. Onların birgə nikahdan iki övladları olub,evli olduqları müddətdə münasibətləri daim yaxşı olub. Sonra qarşılıqlı razılıq əsasında boşansalar da birgə yaşamağa davam ediblər. O, müxtəlif vaxtlarda Rusiya Federasiyasına işləməyə gedib. Sonuncu dəfə Rusiya Federasiyasından qayıtdıqdan sonra keçmiş arvadı artıq onunla yaşamaq istəmədiyini bildirib. Buna görə də münasibətləri kəskinləşib. Bıçağı birgə yaşadıqları mənzildən hadisədən bir gün qabaq götürüb.

O, hadisə günü zərərçəkmişi qorxutmaq məqsədilə üzərində gəzdirdiyi bıçağı çıxarıb. Əsəbi olduğundan zərərçəkmişə çoxsaylı xəsarətlər yetirib. İlk zərbəni mərhumun dodaq nahiyyəsinə vurub, yerə çökdükdən sonra isə bədəninin müxtəlif nahiyyələrinə zərbələr endirib.

Lənkəran Ağır Cinayətlər Məhkəməsinin qərarı ilə təqsirləndirilən şəxs Cinayət Məcəlləsinin 29, 120.2.4-cü maddəsində nəzərdə tutulmuş cinayət əməlini törətməkdə təqsirli bilinərək 11 il 03 ay müddətə azadlıqdan məhrum edilib.