"Oleq Bakinski"nin dəstə üzvləri deyilən şəxslərlə bağlı
Bu gün, 09:40
Ali Məhkəmədə hədə-qorxu ilə tələb etmədə təqsirləndirilən Rail Cəbrayılov, Üzeyir Ağazadə (Zarinski) və Mirağa Əliyevin barəsindəki qərardan verilən kassasiya şikayəti üzrə məhkəmə iclası keçirilib.
Pravda.az-ın əldə etdiyi məlumata görə, hakim Tahir Kazımovun sədrliyi ilə keçirilən prosesdə qərar elan edilib.
Qərara əsasən, şikayət təmin edilməyib.
Qeyd: Rail Cəbrayılov, Üzeyir Ağazadə (Zarinski) və Mirağa Əliyev 2023-cü ilin yanvarında Daxili İşlər Nazirliyinin əməkdaşlarının keçirdiyi əməliyyat nəticəsində saxlanılıb. Həmin əməliyyatdan sonra Ukrayna mediası saxlanılan cinayətkar dəstənin üzvlərinin Oleq Bakinski kimi tanınan keçmiş idmançı, milyonçu Oleq Krapivinin dəstəsi olduğunu yazmışdı.
İttihama görə, hər üç şəxs zərərçəkmiş M.M.-yə (şərti) qarşı zor tətbiq edib özlərini cinayətkar aləmin nüfuzlu şəxsləri kimi təqdim edərək bıçaqla xəsarət yetiriblər. Sonra onlar telefonla videoçəkilişlər edərək ondan rüsvayedici məlumatları yaymaq və sağlamlığına zərər vurmaqla 1 000 ABŞ dollarını hədə-qorxu ilə tələb ediblər.
Xatırlatma: Ukraynalı "kriminal avtoritet" Oleq Krapivin DİN Mütəşəkkil Cinayətkarlığa Qarşı Baş İdarəsi tərəfindən Bakıda həbs edilib. Hazırda onun cinayət işinə Bakı Ağır Cinayətlər Məhkəməsində baxılır. Ona Cinayət Məcəlləsinin 221.3-cü (xuliqanlıq, silah qismində istifadə olunan əşyalardan istifadə etməklə törədildikdə), 127.2.3 (Qəsdən sağlamlığa az zərər vurma), təqsirləndirilən Konstantin Kuçerə isə 178.4-cü (dələduzluq - xüsusilə külli miqdarda ziyan vurmaqla törədildikdə), 221.3-cü (xuliqanlıq, silah qismində istifadə olunan əşyalardan istifadə etməklə törədildikdə) maddəsi ilə də ittiham verilib.
Geri qayıt