Azərbaycanın Vətən müharibəsindəki Zəfərinin 5 illiyi hərb tariximizə yazılacaq möhtəşəm paradla yadda qaldı. Buna qədər 2020-ci il dekabrın 10-da Bakıda Azadlıq meydanında Vətən müharibəsində qələbə şərəfinə Zəfər paradı, 2023-cü il noyabrın 8-də isə Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan hərbi parad keçirilmişdi.
Bu dəfə isə qələbənin beş illiyi ilə bağlı keçirilən üçüncü parad sözün həqiqi mənasında Zəfərə möhür vuran bir hadisə oldu. Ümumiyyətlə, hərbi parad dövlətin gücünü və vətəndaşların qürurunu nümayiş etdirən bir mərasimdir, xüsusilə də Zəfərin ildönümünə həsr olunmuş parad.
Azərbaycan üçün bu, sadəcə, müharibədə qazanılan Qələbənin 5-ci ildönümü deyil, həm də həqiqətin, ədalətin qələbəsidir. Çünki Vətən müharibəsində Azərbaycan xalqı təkcə öz ərazilərini geri qaytarmadı, həm də birliyini, vətənpərvərliyini nümayiş etdirdi. 8 noyabr paradı isə qalib Ordumuzun düşmən üzərində tam və birdəfəlik Qələbəsinin tərənnümü oldu. Qalib Azəraycan əsgərinin paytaxtın baş meydanında məğrur yürüşü ümumxalq həmrəyliyimizin təcəssümü və düşmənə qarşı yumruq kimi birləşmiş bir xalqın müqəddəs Vətən sevgisinin təzahürü oldu.
Prezident İlham Əliyev Zəfər paradındakı çıxışında Vətən müharibəsi ilə bağlı bir sıra mühüm məsələlərə toxunaraq həqiqətləri bir daha bəyan etdi və xatırlatdi ki, İkinci Qarabağ müharibəsindən əvvəl Ermənistanda onların tanklarının Bakı küçələrində olacağını, özlərinin isə Bakıda çay içəcəklərini deyirdilər: "Əslində, onların bu arzuları gerçəkləşdi, onu biz gerçəkləşdirdik. Hərbi Qənimətlər Parkında erməni tankları var, erməni cinayətkarlar isə Bakıda istintaq təcridxanasında çay içirlər". Bu erməni separatizmi üçün tarixi dərsdir. Türkiyənin Prezidenti Rəcəb Tayyib Ərdoğan, Pakistanın Baş naziri Məhəmməd Şahbaz Şərifin çıxışı da bu təntənənin təzahürü idi. Azərbaycan bu paradla dünya ictimaiyyətinə, xüsusilə Cənubi Qafqaz bölgəsində sülh və sabitlik arzulayan xarici qüvvələrə də, müxtəlif təxribatlarla regionumuzu qarışdırmaq istəyənlərə də mühüm bir mesaj vermiş oldu.
Ötən beş il ərzində Azərbaycanın bir neçə strateji hədəfi var idi. Onlardan birincisi, ərazi bütövlüyü bərpa edildikdən sonra suverenliyin tam bərpa edilməsi idi. Yəni Qarabağda, o cümlədən Xankəndidə Azərbaycanın üçrəngli bayrağının dalğalandırılması, oradakı erməni separatizminə son qoyulması və suverenliyin təmin edilməsi əsas məqsəd idi.
Azərbaycan bu strateji hədəfə nail oldu və burada ordunun əməyi xüsusi önəm daşıdı. Bu, bir növ diplomatiyada qazanılan zəfərin də paradı hesab oluna bilər. İndiyə qədər hərbi müstəvidə qalib gələn Azərbaycan bu beş ildə diplomatiya sahəsində də qələbə qazandı. Dövlət bu paradla Azərbaycanın təkcə hərbi üstünlüyünü deyil, həm də siyasi iradəsini və diplomatik strategiyasını yenidən nümayiş etdirdi. Bu tədbir bölgədə digər tərəfləri sülhə və sabitliyə dəvət edən, ölkəmizin öz ərazi bütövlüyünü qorumaq istiqamətində qətiyyətini göstərən mühüm addımdır.
Milli Zəfərimizin 5 illiyi münasibətilə keçirilən paradda Türkiyə və Pakistan dövlət rəhbərlərinin, bu ölkələrin Silahlı Qüvvələrinin şəxsi heyətinin iştirak etməsi, əldə olunan zəfərin bundan sonra da üç dövlət tərəfindən qardaşlıq rəmzi olaraq qorunmasının simvoludur. Bu fakt Azərbaycanın gələcəkdə hansı dövlətlərlə birgə addımlayacağına dair açıq bir mesajdır.
Türkiyə Silahlı Qüvvələri NATO üzvü olan tək türk-müsəlman dövlətidir və dünyanın ən güclü ordulardan birinə sahibdir. Eyni zamanda, nüvə silahına malik tək islam dövləti olan Pakistan Yaxın və Orta Şərqdə hesablaşılacaq bir gücdür. Eyni zamanda 8 noyabr paradında nümayiş etdirilən silah-sursat, nizami ordu Azərbaycan Silahlı Qüvvələrinin dünyanın ən güclü ordularından biri olduğunu bir daha təsdiqlədi.
Bir sözlə, Bayrağında ay-ulduz əks olunan üç dost və qardaş ölkənin, Bakıda hərbi paradda birgə iştirakı beynəlxalq miqyasda türk-islam birliyinə qarşı olan bir çox güc mərkəzlərinə verilən ciddi siyasi mesaj oldu. Bu baxımdan Bakı paradı həm də bütün əzilən, haqları pozulan, ədalətsizliyə məruz qalan xalqlar üçün gücün yaratdığı ədalətin nümayiş etdirilməsi hadisəsidir.
Ağarəhim Baxışov – Dövlət İdarəçilik Akademiyası
"DİA-AZ"
