Daha hansı icra başçısı üçün YOLUN SONUDUR...

Qeyd edək ki, iyunun 21-də Prezident İlham Əliyevin sərəncamı ilə vəzifəsindən azad edilən sabiq icra başçısının həbsi ölkədə korrupsiyaya qarşı mübarizənin nə qədər sistemli və qətiyyətli şəkildə aparıldığını bir daha təsdiqləyir. Son illər Azərbaycanda şəffaflığın təmin olunması, vəzifə səlahiyyətlərinin pozulmasının qarşısının alınması istiqamətində atılan addımlar, DTX və digər müvafiq qurumların genişmiqyaslı əməliyyatları ilə müşayiət olunur. Bu proses yalnız müəyyən şəxslərin məsuliyyətə cəlb olunmasından ibarət olmayıb, həm də dövlət idarəçiliyində sağlamlıq və ədalətin təmin olunması, vətəndaşların dövlətə olan inamının artırılması məqsədini daşıyır.

İcra başçısının həbsini şərh edən ekspertlər də hesab edir ki, korrupsiyaya qarşı mübarizə ölkəmizdə davamlı xarakter daşıyır və bu istiqamətdə fəaliyyətlər gələcəkdə də intensivləşdiriləcək.

DTX-nin həyata keçirdiyi əməliyyatların həm xalqın, həm də dövlətin maraqları baxımından mühüm əhəmiyyətə malik olduğunu deyən A.Həsrət qeyd edib ki, nə qədər ki, qanunu saymayan, harınlamış icra başçıları var, DTX bir o qədər çox əməliyyat keçirəcək: “Əlbəttə, heç kimin həbs olunmasını arzulamırıq, amma Prezident İlham Əliyevin etimad göstərib, vəzifə tapşırdığı şəxslər bu etimadı layiqincə doğrultmağa borcludular. DTX bu əməliyyatı keçirməyə ehtiyac görübsə, demək ki, əllərində yetəri qədər fakt və dəlillər olub. Bu dəlillərə əsaslanaraq belə bir əməliyyat keçiriblər. Qeyri-rəsmi məlumatlarda korrupsiya halları olduğu bildirilir. Əməliyyatın konkret detalları isə yəqin ki, yaxın günlərdə ictimaiyyətə açıqlanacaq. Prezidentin etimad etdiyi vəzifəli şəxslər dövlətə və ölkə başçısına xəyanət etməməli, vətəndaşı dövlətdən narazı salmamalı, dövlət əmlakını talamamalıdır. Heç kim, nə naziri, nə icra başçısı, nə deputatı statusuna arxayın olub vəzifə səlahiyyətlərini aşmamalıdır. Qanun qarşısında hər kəs bərabər hüquqa sahibdir. Digər rayonlarımızda da vəzifə səlahiyyətlərini aşan, vətəndaşları narazı salan, xırda problemləri belə gözardı edən başçılar var. Çox güman ki, gələcəkdə onlarla bağlı da ölçü götürüləcək. Səhvləri olan səlahiyyətli şəxslər indidən özlərinə çəki-düzən versinlər ki, DTX onların da qapısını döyməsin!”.

“Ölkə başçımız illər öncə korrupsiyaya bulaşmış məmurlara öz işlərində düzəlişlərin edilməsi istiqamətində tapşırıqlar verəndə qeyd etmişdi ki, əgər fəaliyyətlərində düzəlişlər edə bilmirlərsə, nə qədər gec deyil, vaxtında ərizələrini yazıb vəzifədən uzaqlaşsınlar. Görünür, onlar deyilənlərdən nəticə çıxarmır və düşünürlər ki, onların əməlləri görünmür. Bu, əsla belə deyil. Bu gün hər bir məmurun fəaliyyəti haqqında dövlətdə kifayət qədər məlumatlar var. Heç kim fikirləşməsin ki, ölkədə aparılan korrupsiya və rüşvətxorluğa qarşı mübarizə tədbirləri müəyyən vaxtdan sonra bitəcəkdir. Ölkədə korrupsiyaya qarşı mübarizə tədbirləri də kampaniya xarakterli deyil”.