Məmmədəli Ağayev Moskvada saxlanıldı

Moskva Akademik Satira Teatrının keçmiş direktoru Məmmədəli Ağayev dələduzluq ittihamı ilə Moskvada saxlanılıb.

Axşam.az xəbər verir ki, bu barədə "BAZA" teleqram kanalı məlumat yayıb.

İstintaqın versiyasına görə, Ağayev fərdi sahibkar kimi qeydiyyatdan keçərək teatra saxta müəlliflik müqavilələri təqdim edib. Sənədlərə əsasən, o, guya müxtəlif tamaşaların ssenarilərini yazıb, müəlliflik hüququnu teatra ötürüb və hər tamaşadan kassadan yığılan gəlirin 4%-ni qonorar kimi alıb. Lakin təqdim olunan hesabatlar və müqavilələrin saxta olduğu üzə çıxıb. Ümumilikdə mənimsənilən məbləğin 20 milyon rubl (təxminən 423 min manat) olduğu bildirilir.

Hadisə ilə bağlı Rusiya Cinayət Məcəlləsinin 159-cu maddəsinin 4-cü bəndi (xüsusilə böyük miqyasda dələduzluq) üzrə cinayət işi başlanılıb.

Ağayev 1992–2021-ci illərdə Satira Teatrına rəhbərlik edib. 2018-ci ildə o, "Rusiya Federasiyasının Əməkdar incəsənət xadimi" fəxri adına layiq görülüb.