DİM-in dövlət qulluğuna KADR SEÇMƏKLİYİ...
25-07-2023, 09:24
DİA.AZ: - "Biz dövlət qulluğuna hazırlıqla kurslar keçirik, tələbələrimiz imtahanlarda iştirak edir amma bəzi hallarda suallar səhv olsa da, Dövlət İmtahan Mərkəzi cavabları öz bildikləri kimi qeyd edirlər. Nəticədə namizədlərin hüquqları pozulur, biz bu imtahan nəticələri ilə bağlı məhkəməyə müraciət etdik və məhkəmədə iddiamız təmin olundu..." Bu barədə DİA.AZ-a edilən müraciətdə bildirilir.
Daha sonra müraciət müəllifləri yazır: "Dövlət qulluğuna qəbul Dövlət İmtahan Mərkəzi (DİM) tərəfindən test üsulu ilə aparılır. imtahanların və sualların keyfiyyəti imtahan iştirakçıları arasında narazılıq yaradır.
Belə ki, imtahanda verilən test tapşırıqlarının əhəmiyyətli hissəsi söz oyunu üzərində qurulur. Bu isə namizədi qanunvericiliyin mahiyyətini öyrənməyə, normativ hüquqi aktların konkret hüquqi münasibətlərdə tətbiqini başa düşməyə yox, səthi olaraq əzbərləməyə kökləyir ki, bu da DİM-in özünün namizədlərdən gözlədiyi səriştəlilik prinsipinə ziddir.
Dövlət İmtahan Mərkəzi dövlət qulluğuna imtahan keçirən bir qurum olsa da təəssüflər olsun ki, bəzi ekspertlər, müəyyən fənlər üzrə mütəxəssislər DİM-in adına xələl gətirirlər”.
Artıq neçənci dəfədir ki, keçirilən test imtahanlarında yanlış testlər qoyulur və ya testlərdə yanlış cavablar götürülür. Misal olaraq DİM-in 17 fevral tarixində BA vəzifə qrupları üzrə keçirilən imtahanında təqdim olunan test tapşırıqlarını qeyd etmək olar. Həmin testləri hazırlayan şəxslər nəinki sualların yanlış olduğunu etiraf etmək istəməmirdilər, hətta doğru hesab etdikləri cavabları belə əsaslandıra bilməmişlər.
Xüsusən də Qanunvericiliklə bağlı suallarda daha çox səhv və yanlışlıqlar, habelə qeyri-müəyyənliklər müşahidə edilir. “Dövlət qulluğuna qəbul, dövlət qulluğunda fəaliyyətin davam etdirilməsi və dövlət qulluğu vəzifələrinin tutulması məqsədi ilə keçirilən test imtahanları üçün test nümunələrinin hazırlanması, ekspertizası, təsdiqi, test imtahanının təşkili, keçirilməsi, qiymətləndirmənin aparılması Qaydası”nın təsdiq edilməsi haqqında Azərbaycan Respublikası Nazirlər Kabinetinin 017-ci il 10 mart tarixli 86 nömrəli Qərarının 2.6.5. bəndinə əsasən test tapşırığının şərti və cavabları dəqiq, aydın və birmənalı olmalıdır. Lakin imtahanlarda təqdim olunmuş test tapşırıqları bir çox hallarda göstərilən tələblərdən heç birinə cavab vermir. Belə ki, həmin testlər ya mənasız və heç bir hüquqi, habelə məntiqi əsası olmayan söz oyunları üzərində qurulur ya da testin şərtlərində və cavab variantlarında qanunun mahiyyətini tamamilə təhrif edən, özündə bir-birini təkzib edə bilən anlaşılmaz cümlələrdən istifadə edilir ki, onlar da heç Azərbaycan dilin qrammatikasına uyğun deyil.
Açıq testlərlə bağlı əlavə olaraq digər bir problem doğru cavab variantlarının birini söz oyunu əsasında, digərini məntiqi yanaşma əsasında üçüncüsünü isə “səriştəlilik” prinsipi əsasında götürmələridir. Həmin testləri oxuyan imtahan iştirakçılarının bəzilərində bu testləri nəinki hüquqdan anlayışı olmayan, həm də dövlət dilimizi doğru-dürüst bilməyən “ekspertlər” tərəfindən tərtib olunduğunu hesab edirlər.
Elə təəsürat yaranır ki, Dövlət İmtahan Mərkəzi minlərlə dövlət qulluğçusunun gələcəyi üçün əhəmiyyət kəsb edən imtahanı, imtahan suallarını təhlilini aparmır, test tapşırıqlarının tərtibi üçün vahid standart və yanaşmalar müəyyən etmir, eyni zamanda testlərin izahında vahid mövqe nümayiş etdirmir, hər bir test üzrə ən müxtəlif mövqedən (əksər hallarda isə qanunvericiliyə zidd) yanaşır. Və buradan isə haqlı bir sual yaranır ki, namizədlər testləri işləyərkən hansı testə DİM-in hansı mövqeyindən yanaşsın?
Dövlət İmtahan Mərkəzinin keçirdiyi imtahanlar prosesində ekspertlərin səhlənkarlığı ucbatından vaxtaşırı bu kimi hallara rast gəlinir, dövlət qulluğuna qəbul üzrə proqramdan kifayət qədər xəbəri olmayan şəxslər sual hazırlayaraq namizədlərin vaxtını almamalıdır.
Namizədlər imtahan nəticələri və doğru olmayan testlərdən şikayət etdikdə Dövlət İmtahan Mərkəzi həmin testləri araşdırmayaraq və heç bir əsaslandırma təqdim etməyərək sadəcə şablon olaraq suallarda səhv olmadığını bildirirlər.
2023-cü ilin 12 fevral tarixində dövlət qulluğuna qəbul üzrə keçirilən imtahan suallarından bir neçəsi ilə bağlı Bakı İnzibati Məhkəməsi qərar çıxararaq (əlavə olunur) həmin testlərin DİM tərəfindən yanlış tərtib edildiyi və onların namizədlərin xeyirinə hesablanaraq, ballarına əlavə olunması ilə bağlı qərar qəbul edib.
Hesab edirik ki, həmin suallar ulduzla göstərilməli və dövlət qulluqçularının xeyrinə həll olunaraq onlara əlavə bal gətirməlidir".
Məsələ ilə bağlı diaaz.space olaraq bütün maraqlı tərəfləri dinləməyə hazırıq...
Geri qayıt